АЛ-КУВАЙТ, 29 июнь. /«Дунё» АА/. Ўзбекистонда ишлаб чиқарилган тиббий ниқобларнинг навбатдаги жўнатмаси Кувайт бозорига етказилди, деб хабар бермоқда “Дунё” АА мухбири.
Тиббий ниқоблар экспорти Ўзбекистон Республикасининг Кувайтдаги элчихонасининг фаол кўмагида, жорий йилнинг май ойи охирида ҳамкор мамлакатнинг «Fursan Al Khaleej» компанияси билан «Ўзтекстилсаноат» уюшмаси ҳузуридаги «Енгилсаноатсавдо» ўртасида имзоланган шартнома доирасида амалга оширилди.
Ўзбекистон тўқимачилик саноати маҳсулотлари «Навоий» халқаро аэропортидан махсус халқаро юк самолётида Кувайтга етказиб берилди.
Ўзбекистоннинг Кувайтдаги элчиси Б.Аълоев маълумотига кўра, жорий йилнинг июнь ойида Кувайтга умумий қиймати 850 минг долларлик тиббий ниқоблар экспорт қилинган. Кувайтнинг «Fursan Al Khaleej» компанияси билан Наманганнинг «Saidbek Muhayyo Savdo» ва «AL-Bois» корхоналари ўртасида қўшимча 6 миллион доллар қийматга эга шартнома имзоланди. Айни пайтда ушбу Ўзбекистон компаниялари томонидан ишлаб чиқарилган тиббий ниқоблар ва қопқоқлар намуналари синов учун Кувайтга келтирилди.
Ал-Кувайтдаги «Perfect Dental Care» стоматология тиббиёт клиникаси шифокори Морика ал-Атаиш клиниканинг ходимлари ўз беморларини даволашда биринчи бўлиб ўзбек тиббий ниқобларидан фойдаланишни бошлаганликларини мамнуният билан таъкидлади. Унинг сўзларига кўра, Ўзбекистон томонидан ишлаб чиқарилган ниқоблар сифатли ва яқин келажакда улар Кувайтдаги кўплаб тиббиёт муассасаларида кенг қўлланилишига шубҳа йўқ. Шу мақсадда клиника ўз ходимларига Ўзбекистон элчихонаси ва ўзбекистонлик экспорт қилувчиларга тиббий маҳсулотларни фаол равишда тарқатишда ҳар томонлама ёрдам беришга тайёр.
