TOSHKENT, 7-dekabr. /“Dunyo” AA/. Qashqadaryo viloyatining Mirishkor tumanida trikotaj mahsulotlari ishlab chiqarish korxonasini foydalanishga topshirish marosimi bo‘lib o‘tdi, deb xabar bermoqda “Dunyo” AA muxbiri.
Investitsiyalar va tashqi savdo vazirligi (ITSV) maʼlumotiga ko‘ra, umumiy qiymati 24 milliard so‘mlik investitsiya loyihasi «Mirishkor textile group» klasteri tarkibiga kiradi. Ushbu bosqichda korxonada 300 ta ish o‘rni yaratildi. Keyinchalik ishlab chiqarishni kengaytirish, ish o‘rinlari sonini 700 taga yetkazish rejalashtirilgan.
Korxonada ishlab chiqarilayotgan tikuv va trikotaj mahsulotlarini Rossiya, Turkiya, Qozog‘iston, Xitoy va boshqa yaqin va uzoq xorij mamlakatlariga eksport qilish rejalashtirilgan.
Tadbirning ochilishida Investitsiyalar va tashqi savdo vazirligining Qashqadaryo viloyati boshqarmasi rahbariyati, mahalliy hokimliklar, ommaviy axborot vositalari va keng jamoatchilik vakillari ishtirok etdi. Amalga oshirilayotgan loyiha mamlakatimizda tadbirkorlik uchun yaratilgan qulay shart-sharoitlar yaratilgani samarasi ekani taʼkidlandi. Shuningdek, viloyatda ishlab chiqarish hajmini oshirish, xomashyoni qayta ishlash va to‘qimachilik mahsulotlari eksporti geografiyasini kengaytirish uchun yetarli resurslar mavjudligi qayd etildi.