ТОШКЕНТ, 25 февраль. /«Дунё» АА/. Ўзбекистон фермер, деҳқон хўжаликлари ва томорқа ер эгалари кенгаши Туркиянинг гулчиликка ихтисослашган «Yenice seracilik» оилавий ширкати билан ҳамкорлик қилишга келишиб олди, деб хабар бермоқда «Дунё» АА мухбири Кенгаш манбасига асосланиб.
Қайд этилишича, мамлакатимизнинг бир гуруҳ фермерлари Туркиянинг гул етиштириш тажрибасини ўрганиш мақсадида ушбу мамлакатда бўлди. Ушбу мамлакат Европа давлатларига гул етказиб беришда етакчилардан ҳисобланади.
Мамлакатимиз вакиллари сафар давомида «Yenice seracilik» ва «Aziya zera» оилавий ширкати фаолияти билан яқиндан танишишди. Ер майдони минг гектар бўлган «Yenice seracilik» ширкатининг 70 гектар ер майдонида иссиқхона барпо этилган. 90 дан ортиқ оила бу манзилда манзарали гуллар етиштириб, боғ меъморчилиги йўналишида хизмат кўрсатади.
Музокаралар чоғида оилавий ширкат Наманган вилоятидаги илмий марказ билан қўшма корхона ташкил этиб, инвестиция киритиш истагини билдирди.
– Тошкент, Навоий ва бошқа бир қатор вилоятларда иссиқхона технологияларини жорий этган «Aziya zera» оилавий ширкатида бўлдик, – дейди Мингбулоқ туманидаги «Соҳибқирон» фермер хўжалиги раҳбари Солижон Хажамов. – У ерда аҳоли хонадонларида кичик иссиқхоналар ташкил этиш бўйича фикр алмашдик.
Юртимиз вакиллари Туркиянинг Мерсин шаҳридаги экспорт-импорт компанияси билан дуккакли экинлар (мош, нўхат, ловия) экспорт қилишда ҳамкорлик битими имзолашди.
