Р?ГА, 3 февраль. / «Дунё» АА /. Ўзбекистон элчиси Қадамбай Султонов GLOBAL G.A.P. сертификатлаштириш тизимининг Марказий Осиё, Латвия ва Россия бўйича минтақавий координатори Эдита Страздинья билан онлайн музокаралар ўтказди, деб хабар бермоқда «Дунё» АА мухбири.
GLOBAL G.A.P. қишлоқ хўжалиги маҳсулотларининг хавфсизлигини таъминлашга қаратилган илғор қишлоқ хўжалиги амалиётларини ихтиёрий сертификатлаш талабларини (G.A.P. - Яхши қишлоқ хўжалиги амалиёти) амалга оширишга ихтисослашган мустақил халқаро ташкилотдир.
Ўзбекистон элчихонаси хабарига кўра, тадбирда халқаро миқёсда тан олинган стандартларни мамлакатимизда татбиқ этишни кенгайтириш ва маҳаллий қишлоқ хўжалиги маҳсулотларини жаҳон бозорларига экспорт қилиш ҳажмини оширишга қаратилган амалий ўзаро алоқаларни ривожлантириш истиқболлари тўғрисида фикр алмашилди.
Эдита Страздинья Ўзбекистон Президентининг мамлакатда халқаро стандартларни жорий этиш, ажралмас сертификатлаш тизимини яратиш учун меъёрий-ҳуқуқий базани мустаҳкамлаш, ишлаб чиқарилган маҳсулотларни ташқи бозорга чиқаришга кўмаклашиш масалаларига катта эътиборини юқори баҳолади.
GLOBAL G.A.P.нинг минтақавий координатори Ўзбекистон билан 2020 йилда амалга оширилган ҳамкорлик ҳақида тўхталиб, элчихона ва «Ўзстандарт» агентлиги билан биргаликда ташкил этилган ихтисослаштирилган тематик тренинглар натижасида ўзбек экспортчилари ўз маҳсулотларини йирик истеъмол бозорларига чиқариш учун зарур бўлган халқаро стандартлар тўғрисидаги билимларини мустаҳкамлаганини таъкидланди.
Эдита Страздинья GLOBAL G.A.P. раҳбариятининг келгусида Ўзбекистон билан ўзаро алоқаларни бунданда юқори даражада давом эттиришга тайёрлигини маълум қилди.
Музокаралар натижасида элчихона, «Ўзстандарт» агентлиги, ?нвестициялар ва ташқи савдо вазирлиги ҳузуридаги Экспортни ривожлантириш агентлиги, Ўзбекистон Савдо-саноат палатаси, Қишлоқ хўжалигини стандартлаштириш маркази вакиллари, ўзбек экспортчилари ва фермерлари иштирокида февраль-март ойларида сертификатлаштириш масалалари бўйича веб-семинар ташкил этиш тўғрисида келишувга эришилди.
Шунингдек, Эдита Страздиньянинг жорий йил июнь ойида, GLOBAL G.A.P. компанияси президенти ва бош ижрочи директори Кристиан Мюллернинг сентябрь ойида Ўзбекистонга ташрифини ташкил қилиш масаласи муҳокама қилинди.
GLOBAL G.A.P. президентининг Ўзбекистонга биринчи ташрифи халқаро стандартларни жорий этиш жараёнини тезлаштириш ва Ўзбекистоннинг юқори сифатли қишлоқ хўжалиги маҳсулотларини Европанинг йирик истеъмол бозорларига экспорт қилиш ҳажмини ошириш учун кенг имкониятлар очишига хизмат қилиши алоҳида таъкидланди.
