ТОШКЕНТ, 12 март. /«Дунё» АА/. Ўзбекистон Республикаси Энергетика вазирлигида «Enpetrol Enerji» халқаро компанияси раиси Эржан Энгин раҳбарлиги делегация билан музокаралар ўтказилди, деб хабар бермоқда “Дунё” АА мухбири.
Учрашувда вазирнинг биринчи ўринбосари Жўрабек Мирзамаҳмудов меҳмонларни мамлакатимизда амалга оширилаётган ислоҳотлар жараёни, энергетика, нефть-газ ва кимё соҳасидаги истиқболли лойиҳалар билан таништирди.
Ўз навбатида, Эржан Энгин Ўзбекистоннинг энергетика тармоғини ислоҳ қилиш жараёни салоҳиятли инвесторларда катта қизиқиш уйғотаётганини таъкидлади.
Музокараларда истиқболли лойиҳаларда ҳамкорлик имкониятларини ўрганиб чиқиш учун «Enpetrol Enerji» компаниясига зарур маълумотларни тақдим этиш бўйича келишувга эришилди.
«Enpetrol Enerji» – халқаро инжиниринг, ишлаб чиқариш ва қурилиш компанияси бўлиб, у энергетика, нефть-газ, нефть ва нефть-кимё саноати соҳасидаги лойиҳалар, шунингдек, саноат объектлари қурилишларини амалга оширади.
