АБУ ДАБ?, 22 август. /«Дунё» АА/. Ўзбекистоннинг Бирлашган Араб Амирликларидаги элчихонаси томонидан ушбу мамлакат пойтахтида “Etihad Credit Insurance” ва “G42” компаниялари ҳамда “Abu Dhabi Export Office” агентлиги билан икки томонлама ҳамкорликни ривожлантириш бўйича тақдимотлар ташкил этилди, деб хабар бермоқда “Дунё” АА мухбири.
Тақдимотларда Ўзбекистон билан ўзаро ҳамкорликнинг истиқболлари ҳақида қатор таклифлар билдирилди. Шунингдек, БАА экспортида реэкспортнинг ўрни юқори эканлиги инобатга олинган ҳолда Ўзбекистон маҳсулотларини БАА орқали Форс кўрфази ва Африка мамлакатларига реэкспорт қилиш имкониятлари ҳам атрофлича таҳлил қилинди.
Тадбир чоғида “Etihad Credit Insurance” компаниясининг суғурта хизматлари йўналишида Ўзбекистон суғурта компаниялари билан ҳамкорлик қилишдан манфаатдорлик билдирилди. Тақдимот доирасида бўлиб ўтган музокаралар давомида Ўзбекистонда хусусийлаштирилиши режалаштирилаётган банклар имкониятлари ҳамда жорий йил 29 сентябрь куни Дубай шаҳрида бўлиб ўтадиган маҳаллий банкларнинг “роудшоу” тадбири ҳақида фикр алмашилар экан, Амирликлар компанияси унда қатнашишини маълум қилгани ҳолда давлат банкларининг хусусийлаштириш жараёнида иштирок этиш юзасидан ҳам қизиқиш билдирди.
“G42” компанияси Ўзбекистонда “Abu Dhabi Ports” компанияси билан ҳамкорликда Самарқанд шаҳри аэропортида маълумотлар базаси марказини қуриш лойиҳасида иштирок этаётганлигини ҳамда Тошкент шаҳри бўйича “ақлли шаҳар” лойиҳасини амалга ошириш бўйича дастлабки музокараларга киришганлигини маълум қилди.
“Abu Dhabi Export Office” агентлиги Ўзбекистон давлат идоралари ҳамда тижорат банкларига БАА компанияларидан товар (иш-хизматлар) импорт қилиниши учун мамлакатимизга кредит линияларини ажратишга тайёр эканлиги, бу соҳада маҳаллий тижорат банклари ва давлат идоралари билан ҳамкорлик ўрнатишдан манфаатдорлик билдирди.
Музокаралар сўнггида Ўзбекистон ?нвестициялар ва ташқи савдо вазирлиги ҳузуридаги Экспортни қўллаб-қувватлаш агентлиги ҳамда тижорат банклари ўртасида ўзаро ҳамкорликни давом эттириш юзасидан келишувга эришилди.
Маълумот учун: Etihad Credit Insurance – БААнинг федерал экспорт кредит компанияси бўлиб, кичик ва йирик бизнес вакилларини маҳаллий ва халқаро бозорларда рақобатбардошлигини ошириш йўли билан мамлакатнинг нефтдан ташқари стратегик секторларини, савдо, инвестиция ва экспортни қўллаб-қувватлашга ихтисослашган. БААнинг ривожланиш стратегиясига мувофиқ ташкил этилган мазкур ташкилот иқтисодиётни диверсификация қилишга ва нефтга бўлган боғлиқлик даражасини пасайтиришга хизмат қилади.
G42 сунъий интеллект ва “булутли” ҳисоблаш компанияси бўлиб, 2018 йилда Абу Дабида ташкил этилган. Мазкур компания фаолияти давлат сектори, соғлиқни сақлаш, молия, нефт ва газ саноати, авиация ва меҳмонхона бизнесида сунъий интеллектни ривожлантиришга қаратилган. Компания ўзининг Сунъий интеллект институти (Inception Institute of Artificial Intelligence) орқали катта маълумотларни (big data), сунъий интеллект ва машинани ўрганиш (machine learning) соҳасида фундаментал тадқиқотлар ва ишланмалар олиб боради. G42 шериклик, шу жумладан, қўшма корхоналар, стратегик ҳамкорлик шартномалари ва компаниянинг тўғридан-тўғри инвестициялари орқали фаолият юритади.
Abu Dhabi Export Office агентлиги Абу Даби тараққиёт агентлиги томомнидан БАА экспорти, жумладан, реэкспорти учун янги бозорларни топиш учун кредит ва кафолатлар кўринишида харидорларга маблағ тақдим этиш учун ташкил этилган. 2021 йилда Агентлик БАА экспортерлари ва улар ҳамкорларининг бозордаги рақобардошлигини ошириш учун 200 млн.долл. миқдорида маблағ ажратган.
