ТОШКЕНТ, 17 сентябрь. /“Дунё” АА/. Бирлашган Араб Амирликларининг “Masdar Energy” компанияси Навоий вилоятининг Томди туманида шамол салоҳиятини ўрганиш учун тўртта метереологик устун ўрнатди, деб хабар бермоқда “Дунё” АА мухбири Энергетика вазирлиги манбасига асосланиб.
Бу Навоий вилоятида 500 МВт қувватга эга шамол электр станциясини (ШЭС) қуриш лойиҳасини амалга оширишнинг навбатдаги босқичи ҳисобланади.
Келгусида мазкур шамол электр станциясининг қурилиш майдонидаги шамол салоҳиятини ўрганиш натижалари лойиҳанинг техник-иқтисодий ва молиявий асосланишини якунлаш имконини беради. Бу эса халқаро молия институтлари билан кредит шартномаларини тузиш учун асос бўлиб хизмат қилади.
Аввал хабар қилинганидек, 2020 йил 8 июнь куни “Ўзбекистон миллий электр тармоқлари” акциядорлик жамияти билан “Masdar Energy” компаниялари ўртасида электр энергиясини сотиб олиш тўғрисида шартнома имзоланган эди. Ушбу шамол электр станциясини ишга тушириш 2023 йилга режалаштирилган.
Маълумот ўрнида, бу БАА компанияси билан қайта тикланадиган энергетика соҳасидаги ягона қўшма лойиҳаси эмас. БАА компанияси, шунингдек, Навоий вилоятида 100 МВт қувватга эга фотоэлектр (қуёш) станциясини қуриш бўйича халқаро танловнинг биринчи босқичи ғолиби ҳисобланади.
