БУДАПEШТ-ВEНА, 17 июнь. /«Дунё» АА/. Ўзбекистон Республикасининг Австриядаги элчихонаси ходимлари ҳамкорликни йўлга қўйиш ва Венгрия озиқ-овқат саноати корхоналарининг технологик имкониятлари билан танишиш мақсадида Венгриянинг Мошонмадьяровар шаҳридаги сут ишлаб чиқариш илмий-тадқиқот институтида («MTKI») бўлишди, деб хабар бермоқда «Дунё» АА мухбири.
Ташриф давомида «MTKI» бошқарувчи директори Роберт Кочиш, Қишлоқ хўжалиги тадқиқотлари ва инновациялар миллий маркази бош директори ўринбосари ?стван Балла ва «Óvártej Zrt» пишлоқ компанияси ижрочи директори Карло Вольпе билан учрашув ўтказилди.
Мулоқот чоғида элчихона вакиллари Венгрия томонига республикамизда амалга оширилаётган ижтимоий-иқтисодий ислоҳотлар, мамлакатдаги қулай инвестиция ва ишбилармонлик муҳити, янги саноат зоналари, шу жумладан озиқ-овқат саноатини ривожлантиришни қўллаб-қувватлаш, хорижий сармоядорлар учун жозибадор иш шароитларига эга эркин иқтисодий ва кичик саноат зоналари имкониятлари ҳақида батафсил маълумот беришди.
Ўз навбатида, мезбонлар институт ва унинг филиаллари фаолияти бўйича тақдимот ўтказди.
Музокаралар жараёнида институт раҳбарияти Ўзбекистон тадбиркорлари билан яқин ҳамкорлик ўрнатишга қизиқиш билдирди. Шунингдек, икки томонлама мулоқотда институтда тайёрланадиган сут маҳсулотларини биргаликда ишлаб чиқариш имкониятлари муҳокама қилинди.
Маълумот учун, Венгрия сут саноатининг йирик ишлаб чиқарувчиси саналган мазкур илмий-тадқиқот институти озиқ-овқат ва сутни қайта ишлаш технологияси соҳасида илмий изланишлар олиб бориши билан машҳур.
