ТОШКЕНТ, 25 февраль. /«Дунё» АА/. Австрия Федерал иқтисодий палатаси биринчи вице-президенти Рихард Шенц бошчилигидаги Австрия бизнес миссияси ташриф билан Ўзбекистонда бўлиб турибди, деб хабар бермоқда “Дунё” АА мухбири.
Делегация Австриянинг 35 етакчи компаниясидан келган 60 дан зиёд ишбилармонлардан ташкил топган.
Австрия вакиллари сафар давомида Тошкент ва Самарқандда бизнес-форумлар ўтказиш, мамлакатимиз вазирлик ва идоралари, ҳокимликларда учрашувлар ўтказиш, шунингдек, савдо-сотиқ ва сармоявий битимлар имзолашни режалаштирган.
Меҳмонларнинг Тошкентга ташрифи доирасида 27 февраль куни Австрия Федерал иқтисодий палатаси томонидан Буюк ипак йўли мамлакатларидаги энг яхши Австрия инвестиция лойиҳалари учун "Silk Road Business Awards 2020" мукофоти ғолибларини тақдирлаш маросими бўлиб ўтади.
