ТОШКЕНТ, 12 май. /«Дунё» АА/. Дунёдаги энг йирик капиталлашган корпорация «Apple Distribution International Limited» ихтиёрий равишда Ўзбекистонда қўшилган қиймат солиғини тўловчи сифатида рўйхатдан ўтди, деб хабар бермоқда «Дунё» АА мухбири Давлат солиқ қўмитаси матбуот хизмати хабарига асосланиб.
Мазкур компания Ўзбекистондаги I чорак фаолияти натижаларига кўра, давлат бюджетига 59,2 минг AҚШ доллари миқдорида солиқ тўлади.
Аввал хабар қилинганидек, 2020 йилдан бошлаб Ўзбекистон Республикаси ҳудудида жисмоний шахсларга ўз хизматларини электрон шаклда тақдим этадиган хориж компаниялари учун қўшилган қиймат солиғи (ҚҚС) тўлаш тартиби жорий этилган эди.
Бугунги кунга қадар мамлакатимизда электрон хизмат кўрсатаётган 10 та чет эл компанияси “?нтернет-компанияларнинг ҚҚС офиси” орқали қўшилган қиймат солиғи тўловчиси сифатида рўйхатдан ўтди.
