ТОШКЕНТ, 8 март. /“Дунё” АА/. Вертолёт ишлаб чиқариш бўйича дунёнинг етакчи компанияларидан бири “Airbus Helicopters” Ўзбекистон билан ҳамкорликни кенгайтириш истагида, деб хабар бермоқда “Дунё” АА мухбири Туризмни ривожлантириш давлат қўмитаси манбасига асосланиб.
Бу ҳақда компаниянинг Марказий Осиё ва Кавказ мамлакатлари раҳбари Ральф Вэбер Ўзбекистон Республикаси Бош вазир ўринбосари, Туризмни ривожлантириш давлат қўмитаси раиси Азиз Абдуҳакимов билан учрашуви чоғида маълум қилди.
Мулоқотда 19-20 февраль кунлари Тошкентда ўтказилган «Uzbekistan Airports, Aviation & Logistics Forum» I Халқаро авиация форуми доирасида Ўзбекистонда вертолёт ташувларини ривожлантиришга оид эришилган келишувларни амалга ошириш масалалари муҳокама қилинди.
Вертолётлардан нафақат қутқарув ва тиббиёт мақсадларида, балки турли экскурсиялар, экстремал туризм турлари, қояга чиқиш, спортнинг тоғ-чанғи турлари кабиларни ташкил қилишда ҳам фойдаланиш эҳтиёжи мавжудлиги таъкидланди.
Ральф Вэбер «Airbus Helicopters» компаниясининг Ўзбекистон билан ҳамкорлик қилишдан манфаатдор эканини тасдиқлади. Унинг сўзларига кўра, мамлакатнинг вертолёт парки билан таъминланганига оид халқаро тажрибага мувофиқ, Ўзбекистоннинг ушбу ҳаво транспортига эҳтиёжини қондириш учун 25-30 вертолётга эҳтиёж бор.
Учрашув якунига кўра, томонлар вертолётлар ташуви, учувчи, механик, технологлар ва бошқа персонални тайёрлаш, семинар ва тренинглар ташкил қилиш орқали Ўзбекистоннинг хусусий бизнес вакилларини фаол жалб қилиш бўйича қўшма комплекс лойиҳани ишлаб чиқишга келишиб олди.
Маълумот учун, «Airbus Helicopters» Франция-Германия компанияси, дунёдаги энг етакчи вертолёт ишлаб чиқарувчиларидан бири бўлиб, у «Airbus Group» концернининг шўъба корхонаси ҳисобланади.
