ТОШКЕНТ, 4 март. /«Дунё» АА/. Тошкент шаҳрида лицензиялаш ва рухсатнома беришга доир ҳужжатларни оптималлаштириш бўйича амалга оширилган ишлар натижасига бағишланган давра суҳбати ташкил этилди, деб хабар бермоқда “Дунё” АА мухбири.
Ўзбекистон Республикаси Адлия вазирлиги томонидан АҚШ Халқаро ривожланиш агентлигининг (USAID) мамлакатимиздаги ваколатхонаси билан ҳамкорликда ўтказилган тадбирда халқаро экспертлар, давлат бошқаруви органлари ва тадбиркорлар иштирок этди.
Қонунчиликка кўра, лицензия — бу махсус ҳуқуқ. Одатда шуғулланиш мумкин бўлмаган (тақиқланган) фаолиятни бошлаш учун рухсатнома ҳисобланади. Хавфли ишларда қоидаларини ўрнатиш ва уни назорат қилиш зарурати мавжуд бўлганда ушбу фаолият лицензиялаш орқали тартибга солинади.
Бироқ давлатимиз раҳбари таъкидлаб ўтганидек, лицензия ва рухсатномалар орасида ҳисобни юритиш, маблағ ундириш ёки шунчаки назорат қилиш учун жорий қилинганлари ҳам бор. Бундай лицензиялар бозор иқтисодиётига ўтиш жараёнида спекулятив ҳаракатларнинг олдини олиш мақсадида жорий қилинган бўлиб, бугунги кун талабларига жавоб бермайди. ?нвестиция маслаҳатчиси, суғурта брокери, ноширлик, концерт-томоша фаолиятларини бунга мисол қилиб келтириш мумкин.
Дарҳақиқат, лицензия ва рухсатнома олиш билан боғлиқ муаммоларни аниқлаш учун тадбиркорлар ўртасида ўтказилган аноним сўров натижалари ҳам юқоридаги фикрни тасдиқлайди.
Унда мамлакатимиз бўйича 40 мингга яқин тадбиркор соҳада қатор муаммолар борлигини таъкидлаган. Респондентларнинг 32 фоизи лицензия ёки рухсатномани олишда тўловнинг юқорилиги, 23 фоизи лицензияни бериш муддатининг кечикиши, 22 фоизи ортиқча ҳужжатларнинг талаб қилиниши, 3 фоизи ваколатли органлар томонидан пул ёки бошқа иш (хизмат)ларни бажариш талаб қилиниши каби муаммоларга дуч келганини билдирган.
Экспертлар фикрича, мамлакатимизда бизнес юритиш муҳитини янада яхшилаш учун тадбиркорлик фаолиятини тартибга солишнинг муқобил усулларини жорий қилиш лозим.
Тадбирда лицензия олиш тартиби ўрнига ваколатли органни хабардор қилиш амалиётини татбиқ этиш имкониятлари ўрганилди.
Давра суҳбати 70 та лицензия ва рухсатномаларни хабардор қилиш амалиётига ўтказишнинг мақсадга мувофиқлиги қайд этилди. Шунингдек, техник тартибга солиш орқали лицензиялаш тартибини бекор қилиш мумкин бўлган фаолият турлари ҳам аниқланди.
Анжуманда давлатимиз раҳбари топшириғига мувофиқ, лицензиялаш жараёни тўлиқ электронлаштирилиши ҳақида маълумот берилди. «Лицензия» ахборот тизимлари комплекси базасида лицензия, рухсатнома ва хабарномаларга ягона портал орқали ҳужжат топшириш, кўриб чиқиш ва уни бериш амалиёти йўлга қўйилади.
