ТЕҲРОН, 21 декабрь. /«Дунё» АА/. ?қтисодий ҳамкорлик ташкилоти (?ҲТ) Маданият институти веб-сайтида «ЮНЕСКО Ўзбекистоннинг «Бахшичилик санъати»ни инсоният номоддий маданияти мероси рўйхатига киритди» сарлавҳали мақола эълон қилди, деб хабар беради «Дунё» АА мухбири.
Мақолада ЮНЕСКО номоддий маданий меросни муҳофаза қилиш бўйича ҳукуматлараро қўмитасининг XVI сессияси доирасида «Бахшичилик санъати» Ўзбекистоннинг номоддий маданий мероси элементи сифатида инсониятнинг номоддий маданий мероси Репрезентатив рўйхатига киритилгани маълум қилинган. Сессия 13 - 18 декабрь кунлари виртуал режимда ўтказилди. Ўзбекистон делегациясига бош вазирининг ўринбосари, ЮНЕСКО бўйича Ўзбекистон Миллий комиссияси раиси Азиз Абдуҳакимов бошчилик қилди.
Нашрда таъкидланишича, тадбирда Ўзбекистон ҳудудида бахшичилик санъатини ривожланиши тарихини акс эттирувчи махсус видеоролик намойиш этилган.
ЮНЕСКО инсониятнинг номоддий маданий меросининг Репрезентатив рўйхатига ҳеч қандай дебат ёки овоз бермасдан кенг консенсус асосида ушбу элементни киритишни маъқуллаганлига эътибор қаратилган.
Материалда «Бахшичилик санъати» Ўзбекистон томонидан Репрезентатив рўйхатга киритилган номоддий маданий мероснинг олтинчи элементи бўлгани ҳақидаги маълумот келтирилган. «Бунга қадар ушбу рўйхатдан «Бойсун тумани маданий макони» (2008), «Катта ашула» (2009), «Аския» (2014), «Палов маданияти ва анъаналари» (2016) ва «Лазги» (2019) ўрин олган эди. Бундан ташқари, Ўзбекистон бошқа давлатлар билан ҳаммуаллифликда «Шошмақом» (2008), «Наврўз» (2016) ва «Миниатюра санъати» (2020) номинацияларини илгари суришда иштирок этди», дея қайд этилади мақолада.
Мақола, шунингдек, келгуси йилларда «Ўзбекистон кулолчилик мактаби» миллий элементлари, шунингдек, бошқа давлатлар билан биргаликда «Ҳунармандчиликнинг анъанавий услуби», «Рубоб чалиш», «Марказий Осиёда анъанавий каштачилик услуби», «Хўжа Насриддин қиссаларини айтиш анъанаси» каби кўп миллатли номинацияларни қўмита муҳокамасига киритиш режалаштирилгани таъкидланган.
