ТОШКЕНТ, 9 июль. /«Дунё» АА/. Ўзбекистон Республикасининг Бельгия Қироллигидаги элчихонаси кўмагида «Ўзстандарт» агентлиги ва Қурилиш вазирлиги ҳамкорлигида Европа стандартлаштириш ташкилоти (CEN) вакиллари Ашок Ганеш ва Эрик Марчанд билан видеоконференция шаклида мулоқот ўтказилди, деб хабар бермоқда «Дунё» АА мухбири агентлик манбасига асосланиб.
Мулоқот давомида бугунги кунда қурилиш соҳаси учун зарур бўлган Европа стандартлари ва уларнинг ўрни, стандартлар савдодаги техник тўсиқларни бартараф этиш, мамлакатимизда қурилиш соҳасида олиб борилаётган янги ислоҳотлар хусусида фикр алмашилди. Шунингдек, Европа ва халқаро стандартларга мос сифат инфратузилмасини яратиш, қурилаётган янги турдаги биноларни жаҳон андозаларига мос равишда қуриш ва ишлаб чиқарилаётган маҳсулотларни халқаро бозорда салоҳиятини ошириш, инновацияларни жорий этиш, кадрлар тайёрлашда Европа ?ттифоқининг техник кўмагини олиш масалаларига алоҳида урғу берилди.
Учрашувда “Ўзстандарт” агентлиги ва Европа стандартлаштириш ташкилоти (CEN) ўртасида ҳамкорлик битими имзоланганлиги алоҳида қайд этилиб, имзоланган ҳужжат CEN стандартларини олиш ва улардан кенг фойдаланиш имконини яратиши таъкидланди.
Онлайн мулоқот натижасида Европа стандартларини самарали жорий этиш бўйича CENнинг техник экспертлари билан онлайн учрашувлар ташкил этиш ва кенг кўламли доимий ҳамкорлик қилишга келишиб олинди.
