ТОШКЕНТ, 8 январь. /«Дунё» АА/. Жорий йилнинг 11-16 январь кунлари Ўзбеккино миллий агентлиги ташаббуси билан Ёшлар ижод саройида «Янги Ўзбекистон ва миллий кинематография» ойлиги доирасида «Ўзбек миллий кино санъати ҳафталиги» ташкил этилади, деб хабар бермоқда «Дунё» АА мухбири.
Ҳафталик давомида янги кинолойиҳалар тақдимоти, ёшлар учун маҳорат дарслари, давра суҳбатлари, кастинг ва конференциялар ҳамда янги фильмлар премьералари бўлиб ўтиши режалаштирилган.
Бундан ташқари, республика бўйлаб таниқли киноижодкорлар билан ижодий учрашувлар ташкил этилиб, аҳоли билан ўзбек кино санъати тарихи ва бугунги куни бўйича мулоқот уюштирилади.
Учрашувлар сўнггида бир қатор тарихий-бадиий фильмларнинг бепул намойиши бўлиб ўтади. Ушбу ҳафталик давлатимиз раҳбарининг ноябрь ойида янгиланган «Ўзбекфильм» студиясига ташрифи давомида берилган топшириқлари ижроси юзасидан ўтказилмоқда.
Кино ҳафталик доирасида ёш киноижодкорлар учун Бутунроссия давлат кинематография институтининг Тошкентда филиалини очиш, Тошкент Халқаро кинофестивалини ташкил қилиш, чет элда сақланаётган ўзбек фильмларини қайтариш, ёш киноижодкорларга шароит ва имконият яратиш каби муҳим топшириқлар бўйича экспертлар ҳамда мутахассислар билан «Ўзбеккино»нинг 2021 йилги «Йўл харитаси» қабул қилинади.
