ПЕК?Н, 29 январь. /«Дунё» АА/. Ўзбекистоннинг Хитойдаги элчихонасида мамлакатимиз иқтисодиётининг турли жабҳаларида, шу жумладан, қишлоқ хўжалиги соҳасида истиқболли сармоявий лойиҳалар амалга оширилиши жараёнига Чин юрти компанияларини кенг жалб этишга қаратилган фаол саъй-ҳаракатлар олиб борилмоқда, деб хабар бермоқда «Дунё» АА мухбири Шуҳрат Умиров.
«Tianjin Hongli Agricultural Science and Technology Сo. Ltd.» аграр жабҳада инновация технологияларини ривожлантириш ва уларни қўллаш бўйича Хитойдаги етакчи компаниялардан бири ҳисобланади.
Элчихона кўмагида мазкур компания раҳбари Ван Синь ва «Ўзёғмойсаноат» уюшмаси бошқарувининг раиси К. Серкаев ўртасида видеоконференция алоқаси воситасида ташкил этилган музокаралар аввалида Хитой томони вакиллари Ўзбекистонда ҳаётга тадбиқ этилаётган кенг қамровли ислоҳотлар билан яқиндан танишди. Шу ўринда мамлакатимизнинг сармоявий йўналишдаги ҳамда экспорт салоҳиятига алоҳида эътибор қаратилди.
Тадбир чоғида Ван Синь пандемия шароити оқибатларига қарамасдан Ўзбекистон иқтисодиёти изчил ривожланиб бораётганидан яхши хабардор эканини қайд этди. «Саноат ишлаб чиқариши, капитал қурилиш ва қишлоқ хўжалиги сингари соҳалардаги ўсиш суръатлари бундан далолат беради», деди у.
Хитой компанияси раҳбарининг айтишича, айнан ана шундай ижобий омиллар туфайли ўзбек бозори Хитой компанияларининг диққат марказида турган энг устувор бозорлардан бири бўлиб қолмоқда.
Шунингдек, Ван Синь озиқ-овқат маҳсулотлари сифатига талабларнинг тобора ўсиб бораётгани салоҳиятли сармоядорларни энг янги технологияларни қўллашга ундаётганини ҳам қайд этди. «Маҳсулот етиштириш ва уни ишлаб чиқаришдан тортиб то истеъмолчига етказиб беришгача бўлган занжирларни яратишга бўлган эҳтиёж ҳам тобора ортиб бораяпти», - деди Хитой компанияси раҳбари.
Музокаралар якунлари бўйича Ўзбекистонда ёғ олинадиган маданий ўсимликлар, жумладан, соя, кунгабоқар ва ўлкамизда ҳали таомилга кирмаган «йўлбарс ёнғоғи» (tiger nut) етиштиришни ташкил этиш юзасидан келишувга эришилди.
Музокаралар чоғида эришилган келишувни амалий жиҳатдан ҳаётга тадбиқ этиш мақсадида яқин вақт оралиғида «Tianjin Hongli Agricultural Science and Technology Сo. Ltd.» компанияси вакилларининг Ўзбекистонга ташрифи амалга оширилади.
