ТОШКEНТ, 21 январь. /«Дунё» АА/. Кеча Тошкент вақти билан соат 22.00 да (Вашингтонда соат 12.00) АҚШнинг 46-президенти Жо Байденнинг инаугурация маросими бўлиб ўтди, деб хабар бермоқда «Дунё» АА мухбири.
Анъанага кўра, у ва вице-президент Камала Харрис АҚШ Конгресси олдидаги Капитолий тепалигида тантанали қасамёд қабул қилди.
Оқ уйнинг янги раҳбари ўз нутқида америкаликларни қарама-қаршиликлар ва келишмовчилик ҳақида унутишга, шунингдек, «бир-бирларига қулоқ тутишни бошлаш»га чақирди. Унинг сўзларига кўра, АҚШда ҳал қилиниши керак бўлган кўплаб долзарб масалалар, шу жумладан, кўплаб одамларнинг ҳаётига зомин бўлган ва мамлакат иқтисодиётига зарба берган коронавирус пандемияси билан боғлиқ муаммолар мавжуд. Президент COVID-19дан вафот этганлар хотираси учун бир дақиқалик сукут эълон қилди.
Кичик-Жозеф Робинетт Байден 1942 йил 20 ноябрь куни Пенсильвания штатининг Скрантон шаҳрида туғилган. 1972 йил Делавер штатидан АҚШ Сенатига сайланган. У 1988 ва 2008 йилларда бўлиб ўтган президентлик сайловида ўз номзодини қатнашган. 2009–2017 йилларда вице-президент лавозимида фаолият олиб борган.
Ўтган йил ноябрь ойида Вашингтонда бўлиб ўтган Ўзбекистон-АҚШ сиёсий маслаҳатлашувларининг 8-раунди якунлари бўйича ҳамкорликнинг мазкур шаклини Стратегик шериклик мулоқотига айлантириш тўғрисида қарор қабул қилинди. Мулоқотнинг таъсис йиғилишини 2021 йил Тошкент шаҳрида ўтказиш тўғрисида келишувга эришилди.
