ТОШКЕНТ, 6 март. /«Дунё» АА/. 8 март - Халқаро хотин-қизлар куни муносабати билан "Ўзбеккино" Миллий агентлиги қатор премьера ва бепул намойишларни режалаштирган. Хусусан, Ўзбекистон ва Татаристон киноижодкорлари ҳамкорлигида Рашид Маликов ва ?льфат Камалеев томонидан суратга олинган "Сумбул" фильми 6 март кунидан бошлаб катта экранларда намойиш этилади, деб хабар бермоқда «Дунё» АА мухбири агентлик манбасига асосланиб.
Фильмни 7-9 март кунлари кинотеатрларда хотин-қизлар бепул томоша қилиши мумкин.
8 март куни режиссёр Аюб Шаҳобиддинов томонидан суратга олинган "Рангсиз тушлар" фильмининг юртимиз телеканалларида миллий телевизион премьераси ўтказилади. Фильм қатор нуфузли халқаро кинофестивалларда иштирок этган. Бангладешда ўтказилган фестивалда "Энг яхши сценарий" номинацияси бўйича ғолиб бўлган.
Шунингдек, байрам кунлари сўнгги 10 йилликда “Ўзбеккино” Миллий агентлиги буюртмасига биноан суратга олинган 10дан ортиқ фильмнинг телевизион намойиши ҳам бўлади. Улар қаторидан “Паризод”, “Кечиккан ҳаёт”, “Опа”, “Сарвқомат дилбарим”, “?ссиқ нон”, “Саид билан Саида”, “Тенгиз” каби бадиий фильмлар ва “Оксана Чусовитина”, “Лола Муродова” каби ҳужжатли фильмлар ҳам ўрин олган.
Бундан ташқари, Россия давлат фильм фондидан ноёб негативлари қайтарилган "Келинлар қўзғолони" фильмининг ҳам илк телевизион намойиши бўлиб ўтади.
5-11 март кунлари эса Агентлик билан ҳамкорликда Ёшлар ижод саройида таниқли ўзбек рассоми, академик, Ўзбекистонда хизмат кўрсатган санъат арбоби Бахтиёр Назаровнинг аёлларга бағишланган "Аёл мадҳияси" номли кўргазмаси ўтказилади.
