ТОШКЕНТ, 13 октябрь. /«Дунё» АА/. Ўзбекистонлик кино ижодкорлар Россиянинг Самара шаҳрида 15-17 октябрь кунлари ўтказиладиган IX Халқаро спорт фильмлари ва телевидение фестивалида иштирок этади, деб хабар бермоқда «Дунё» АА мухбири.
Халқаро фестивалда Зилола Темирова «ММА Ўзбекистон» номли фильмини тақдим этади. Ушбу фильмда ўзбек спортида янги саҳифа очиб берган аралаш жанг санъатининг мамлакатимизда жадаллик билан ривожланиб бориши йўлида қилинаётган саъйи-ҳаракатлар тўлиқ намоён этилган.
Фильм 15 октябрь куни Самарадаги «Орбита» кинозалида томошабинларга тақдим этилади. Шу ўринда айтиш жоизки, фильм муаллифи коронавирус билан касалланганлиги боис фестивалда онлайн тарзда иштирок этади.
Зилола Темирова ўтган йили ҳам ушбу фестивалда Руфат Ризқиев ҳақидаги «Ўзбек йўлбарси» номли ҳужжатли фильм билан иштирок этиб, ўз йўналишида биринчи ўринни эгаллаган эди.
