БРЮССЕЛЬ, 29 июнь. /«Дунё» АА/. Маҳаллий «Global Export Company» компанияси Нидерландия ва Бельгиядаги йирик дистрибюторлик компанияларига дуккакли дон маҳсулотларини тўғридан-тўғри экспорт қилишни йўлга қўйди, деб хабар бермоқда «Дунё» АА мухбири.
Хусусан, компания эришилган келишувга кўра, жорий йилда қиймати 2 миллион АҚШ долларига тенг маҳсулот экспорт қилади. Унга кўра, йил якунига қадар 330 тонна дуккакли дон маҳсулотлари етказиб берилади. Хусусан, жорий йилнинг июль ойида шу йил етиштирилган мош ва ловия ҳосилидан 50 тонна маҳсулотни Бельгияга жўнатиш кўзда тутилган.
Компания вакилига кўра, «Global Export Company» масъулияти чекланган жамиятига ?нвестициялар ва ташқи савдо вазирлиги ҳузуридаги экспортни ривожлантириш агентлиги томонидан кўрсатилган молиявий кўмак ёрдамида тайёрланаётган озиқ-овқат маҳсулотларининг хавфсизлиги бўйича халқаро стандартлар жорий этилган. Натижада юқори сифатли дуккакли маҳсулотларни бозорларга узлуксиз етказиб бериш бошланди. Шунингдек, Бельгия ва Нидерландиядан бизнес-ҳамкорларни топишда мамлакатимизнинг Бенилюкс давлатларидаги элчихонаси катта ёрдам бермоқда.
Эслатиб ўтамиз, «Global Export Company» мамлакатимизда дуккакли дон маҳсулотларини экспорт қилиш бўйича йирик компаниялардан бири ҳисобланади. Корхонанинг йиллик экспорт ҳажми 10 минг тоннани ташкил қилади. Компания мамлакатимизнинг барча ҳудудларидаги фермер ва деҳқон хўжаликлари томонидан етиштирилган маҳсулотларни халқаро бозорда сотишга кўмаклашади.
Шу ўринда таъкидлаш керак, элчихона томонидан мамлакатимизда етиштирилган қишлоқ хўжалиги ва ишлаб чиқарилган тесктиль маҳсулотларини Европа давлатларига экспорт қилиш учун янги бозорлар ва харидорлар топиш борасидаги саъй-ҳаракатлар давом эттирилмоқда.
