ТОШКЕНТ, 28 январь. /«Дунё» АА/. Transparency International халқаро ташкилоти 2020 йилги Коррупцияни қабул қилиш индексини эълон қилди, деб хабар бермоқда «Дунё» АА мухбири.
Коррупцияга қарши курашиш агентлиги маълумотига кўра, Transparency International коррупцияга қарши курашиш халқаро нодавлат ташкилоти Коррупцияни қабул қилиш индексининг 2020 йил рейтингини ишлаб чиқди.
Рейтингга мувофиқ, Ўзбекистон ўз ўрнини 7 поғонага ўзгартириб, 180 та давлат орасида 146-ўринни эгаллади (2019 йилда 153-ўрин).
Шу билан бир қаторда, рейтингда Ўзбекистон 26 баллни қайд этди, бунда 0 балл – коррупцияни қабул қилишда энг юқори кўрсаткич, 100 балл – энг паст шкала ҳисобланади.
Мазкур ижобий ўзгаришларнинг сабаби сифатида сўнгги йилларда коррупцияга қарши курашишнинг ҳам ҳуқуқий, ҳам институционал асослари мустаҳкамланаётгани, ушбу жиддий муаммо давлат ва жамият кун тартибида кенг муҳокама қилиниб, коррупцияга тоқатсизлик муҳити шаклланиб бораётганлигидир.
Кейинги вақтларда коррупция иллатига қарши кураш масаласида давлат органларининг тоборо очиқлик намоён қилаётганлиги, фуқароларни бу борада қийнаб келаётган муаммоларни муҳокама қилишга тайёрлиги ҳамда уларнинг ечимини биргаликда ишлаб чиқишга мойиллик яққол кўзга ташаланаётгани Коррупцияни қабул қилиш индексининг туб моҳиятига мос келади.
