ТОШКЕНТ, 6 апрель. /«Дунё» АА/. Ўзбекистон Бош вазирининг ўринбосари Сардор Умурзоқов раислигидаги вазирликлар, идоралар, тармоқ бирлашмалари ва тижорат банклари раҳбарларидан иборат Ташқи савдо, инвестициялар, маҳаллий саноатни ривожлантириш ва техник жиҳатдан тартибга солиш масалалари бўйича ҳукумат комиссияси Самарқанд вилояти шаҳар ва туманларининг ижтимоий-иқтисодий ривожланишининг жорий ҳолатини ўрганиш ҳамда инвестициявий, саноат ва экспорт салоҳияти ва имкониятларини ишга солиш бўйича таклифлар ишлаб чиқиш мақсадида мазкур ҳудудга йўл олди, деб хабар бермоқда «Дунё» АА мухбири.
?нвестициялар ва ташқи савдо вазирлиги (?ТСВ) маълумотига кўра, ташриф давомида Самарқанд шаҳридаги Ёшлар ижод саройида вилоят тадбиркорлари ва экспортчилари билан учрашув ташкил этилди.
Учрашувдан кўзланган мақсад - тизимли масалаларни муҳокама ва таҳлил қилиш ҳамда масъул тузилмаларни жалб қилган ҳолда ишбилармонлар муаммоларини тезкор ҳал қилишдан иборат бўлди.
Тадбирда иштирок этган 200 дан ортиқ тадбиркор инвестициявий лойиҳаларни амалга ошириш, ишлаб чиқариш ва экспортга етказиб бериш жараёнида дуч келаётган масалаларни кўтариб чиқиш имконига эга бўлди.
Муҳокама давомида ҳудуддаги тадбиркорлар, асосан, ишлаб чиқаришни кенгайтириш, инвестициявий лойиҳаларни амалга ошириш ёки айланма маблағларни тўлдириш учун кредит маблағларини ажратиш, рухсатномалар, сертификатлар ва лицензиялар олиш, муҳандислик коммуникацияларга уланиш, шунингдек, ер ажратиш билан боғлиқ муаммоларга дуч келишларини маълум бўлди.
Кўтарилган ҳар бир масала комиссия аъзолари томонидан тегишли вазирликлар, идоралар, маҳаллий ҳокимият органлари раҳбарлари иштирокида ҳар томонлама кўриб чиқилди. Ҳар бир муаммони амалий ҳал қилиш механизмлари ишлаб чиқилиб, тегишли раҳбарларга ижро этиш муддатлари аниқ белгиланган ҳолда манзилли кўрсатмалар берилди.
Шунингдек, вазирликлар, идоралар, тижорат банклари ва маҳаллий ҳокимият органлари раҳбарларига келиб тушаётган мурожаатлар юзасидан зудлик билан зарур чоралар кўриш мақсадида тадбиркорлар билан ҳамкорликни фаоллаштириш топширилди.
Учрашув якунида мутасадди раҳбарларга тадбиркорлар ва экспортчиларнинг муаммоларини ҳал қилиш бўйича аниқ топшириқлар берилди.
