ТОШКЕНТ, 3 август. /«Дунё» АА/. Ўзбекистон Республикаси Маданият вазирлиги буюртмасига кўра "Ўзбеккино" миллий агентлиги билан ҳамкорликда Туркияда «Жалолиддин Мангуберди» сериалининг суратга олиш ишлари бошланди, деб хабар бермоқда «Дунё» АА мухбири «Ўзбеккино» миллий агентлиги ахборот хизмати манбасига асосланиб.
Туркиянинг «Bo‘zdag‘ film» студияси томонидан суратга олинаётган кўп қисмли фильмга Меҳмет Бўздағ режиссёрлик қилмоқда. Картина сценарийси Назар Эшонқул томонидан ёзилган.
Айни пайтда Туркиянинг Аксарай вилояти ҳудудида суратга олинаётган сериал учун махсус тарихий декорациядан иборат павильон қурилди. Сериалда бош қаҳрамон Жалолиддин Мангуберди ролини турк актёри Эмре Кивилжим ижро этади. Шунингдек, ўзбекистонлик актёрлар Тоҳир Саидов, Жавоҳир Зокиров, Акбархўжа Расулов, Райҳон Уласенова, Раъно Шодиева, Феруза Норматова, Юлдуз Ражабованинг ҳам янги сериалда суратга тушиши кутилмоқда. Сериалнинг илк мавсуми 13-қисмдан иборат бўлади.
