O‘zbekistonda turizm sohasining rivojlanishi bilan bir qatorda turistik yo‘nalishlar ham tobora kengayib bormoqda. Mamlakatda ziyorat, madaniy, gastronomik, ekologik, tog‘-sarguzasht va boshqa turizm turlari faol rivojlantirilib, yil davomida mahalliy hamda xorijiy sayyohlar uchun turli imkoniyatlar yaratilmoqda.
Boy tarixiy-madaniy meros, qadimiy shaharlar, milliy an’analar va betakror tabiat maskanlari O‘zbekistonni turli xil sayohat tajribalarini taklif etuvchi jozibador yo‘nalishga aylantirmoqda. Samarqand, Buxoro va Xiva kabi tarixiy shaharlar madaniy turizm markazlari sifatida mashhur bo‘lsa, tog‘ hududlari, milliy bog‘lar va tabiiy manzaralar ekologik hamda sarguzasht turizmini rivojlantirish uchun katta imkoniyat yaratmoqda.
Shuningdek, milliy taomlar va an’anaviy oshxona madaniyatiga qiziqish ortib borayotgani gastronomik turizmning rivojlanishiga xizmat qilmoqda. Turizm yo‘nalishlarining xilma-xilligi O‘zbekistonning xalqaro turizm bozoridagi jozibadorligini yanada oshirmoqda.
