ТОШКЕНТ, 13 март. /«Дунё» АА/. Тошкент шаҳар ҳокимлигида Россия Федерациясининг Омск вилояти делегацияси вакиллари билан учрашув бўлиб ўтди, деб хабар бермоқда «Дунё» мухбири ҳокимлик манбасига таяниб.
Омск вилояти иқтисодиёт вазирининг ўринбосари Денис Кушнер ҳокимлик вакилларига қабул учун миннатдорлик билдириб, ўзаро манфаатли ҳамкорлик истиқболларини белгилаб олиш юзасидан ўз фикрларини изҳор қилди.
Вазир ўринбосари Ўзбекистон билан Омск вилояти ўртасида тўқимачилик ва қишлоқ хўжалиги соҳаларида ҳамкорлик алоқалари яхши ривожланганини таъкидлаб, келгусида энергетика, қурилиш, рақамлаштириш, шаҳарсозлик ва бошқа йўналишларда ҳам иқтисодий алоқалар кўламини кенгайтириш ниятини билдирди.
Учрашувда меҳмонларга пойтахтимизнинг туристик салоҳияти ҳақида ҳам маълумот берди. Ўз навбатида Омск вилояти ривожланиш ва инвестиция агентлигининг бош директори Евгений Ковтун ушбу соҳада лойиҳаларни амалга оширишдан манфаатдор эканини билдирди.
