ТОШКЕНТ, 1 июль. /«Дунё» АА/. Ўзбекистон Республикаси Олий Мажлиси Сенати Раиси Танзила Норбоеванинг АҚШ Халқаро тараққиётни молиялаштириш корпорацияси (DFC) бош ижрочи директори Адам Болер бошчилигидаги делегация билан учрашуви бўлиб ўтди, деб хабар бермоқда «Дунё» АА мухбири Сенат манбасига асосланиб.
Учрашувда Ўзбекистон билан АҚШ ўртасидаги муносабатларни янада мустаҳкамлаш давлатимизнинг устувор йўналишларидан бири эканлиги таъкидланди.
Қайд этилганидек, сўнгги йилларда икки томонлама парламентлараро алоқалар динамикасида сезиларли фаоллик кузатилди. Бунга кўп жиҳатдан Ўзбекистон Республикаси Президентининг очиқ, конструктив ва прагматик ташқи сиёсати ёрдам бермоқда.
Бундан ташқари, суҳбатда парламентлараро алоқаларга катта аҳамият берилаётгани қайд этилди. Ўзбекистон-АҚШ парламент ҳамкорлик гуруҳи, АҚШ Конгрессининг «Ўзбекистон бўйича Кокус» ўртасида мулоқотни давом эттириш, демократик ислоҳотлар ва фуқаролик жамиятини шакллантириш бўйича конструктив мулоқотни янада ривожлантириш борасида ўзаро фикр алмашилди.
АҚШ билан икки томонлама муносабатларда савдо-иқтисодий, молиявий, инвестиция ва замонавий технология йўналишда ҳамкорликни кенгайтириш масалалари муҳокама қилинди.
Учрашувда, шунингдек, «Doing business 2020» йиллик рейтингида Ўзбекистон энг юқори кўрсаткични кўрсатган йигирмата мамлакат қаторига киргани эътироф этилди.
Муҳокамалар жараёнида Сенат фаолияти ва парламентдаги аёлларнинг ўрни, хотин-қизларнинг жамиятдаги мавқеини мустаҳкамлаш ҳамда Ўзбекистонда гендер тенглигини таъминлаш масалалари бўйича кўрилаётган чоралар борасида ҳам сўз юритилди.
Шу билан бирга, АҚШ Халқаро тараққиётни молиялаштириш корпорацияси (DFC) билан ўзаро манфаатли ҳамкорлик йўналишлари, мажбурий меҳнатдан фойдаланишга қарши кураш масалалари ва бу борада биргаликда ишлаш истиқболлари бўйича таклифлар билдирилди.
