ТОШКЕНТ, 23 октябрь. /“Дунё” АА/. Кеча Ўзбекистон Олий Мажлиси Сенати Раиси биринчи ўринбосари Содиқ Сафоевнинг “Янги Америка хавфсизлик маркази” (CNAS)нинг Ҳинд-Тинч океани дастури директори Лиза Кёртис билан учрашуви бўлиб ўтди, деб хабар қилмоқда “Дунё” АА мухбири.
Парламент юқори палатаси ахборот хизматининг маълумотига кўра, суҳбат чоғида Лиза Кёртис Ўзбекистонга олдин ҳам келганини ва сўнгги йилларда мамлакатда катта ўзгаришлар юз берганига гувоҳ бўлганини таъкидлади. Ўзбекистонда ўтган 5 йил давомида давлат ва жамият қурилиши, ишбилармонлик ва инвестиция муҳитини яхшилаш, Марказий Осиё мамлакатлари билан дўстлик ва яхши қўшничилик алоқаларини мустаҳкамлаш борасида амалга оширилаётган изчил ислоҳотларга юксак баҳо берилди. Бундан ташқари, Ўзбекистоннинг хорижий давлатлар билан алоқаларни ривожлантириш борасидаги фаол ташқи сиёсий фаолияти алоҳида таъкидлаб ўтилди.
Лиза Кёртис Президент сайловида овоз бериш жараёни очиқлик ва ошкоралик тамойиллари асосида ташкил этилишига ишонч билдирди.
Учрашувда томонларни қизиқтирган бошқа масалалар ҳам муҳокама қилинди.
