ТОШКEНТ, 21 январь. / «Дунё» АА /. Қирғизистон Марказий сайлов комиссияси 79,2 фоиз овоз олган Садир Жапаровни 10 январь куни бўлиб ўтган навбатдан ташқари президентлик сайловида ғолиб деб расман тан олди, деб хабар бермоқда «Дунё» АА мухбири.
Марказий сайлов комиссиясининг қарорида қайд этилишича, референдумда овоз берганларнинг 81 фоиздан ортиғи президентлик бошқаруви шаклини қўллаб-қувватлаган.
Садир Нургожоевич Жапаров Қирғизистон Президенти лавозимига рўйхатга олинган, унга давлат раҳбари гувоҳномаси, кўкрак нишони ва унинг исми-шарифи ва ваколат муддати санаси битилган Президент штандарти (байроқ) топширилган.
51 ёшли Садир Жапаров ?ссиқкўл вилоятида туғилган. У Жисмоний тарбия университети ва Қирғизистон-Россия Славян университетининг юридик факультетида таҳсил олган. Шунингдек, Жокоргу Кенгеш депутати этиб сайланган. 2020 йил 5 октябрь куни Қирғизистон парламенти уни бош вазир ва 15 октябрда эса республика президенти вазифасини бажарувчи сифатида тасдиқлаганди. 14 ноябрь куни Садир Жапаров жорий йил 10 январь куни муддатидан олдин бўлиб ўтган президентлик сайловида қатнашиш учун истеъфога чиқди.
Қонунга кўра, Президентнинг инаугурацияси сайлов натижалари эълон қилингандан кейин бир ой ичида ўтказилиши керак.
11 январ куни Ўзбекистон Президенти Шавкат Мирзиёев телефон орқали мулоқотда Садир Жапаровни президентлик сайловидаги ишончли ғалаба қозонгани, шунингдек, Қирғизистон Конституциясига ўзгартиришлар киритиш бўйича референдум муваффақиятли ўтгани билан табриклади.
