ТОШКЕНТ, 23 сентябрь. /«Дунё» АА/. Ўзбекистон Республикаси Президенти Шавкат Мирзиёевнинг БМТ Бош Ассамблеяси 75-сессиясидаги нутқининг трансляцияси давом этмоқда, деб хабар қилмоқда “Дунё” АА мухбири.
Давлатимиз раҳбари ўз нутқи якунида “жаҳоннинг турли нуқталарида нотинчлик сақланиб қолаётгани, зиддият ва зўравонликлар ортиб бораётгани, экологик офатлар ва бошқа замонавий хатарлар қашшоқлик ва камбағалликнинг глобал муаммоларини” кучайтираётганини алоҳида таъкидлади. Бу муаммолар пандемия даврида янада кескинлашаётганини қайд этди.
Ўзбекистон Президенти шу муносабат билан қашшоқликни тугатиш ва камбағалликка қарши курашишни БМТ Бош Ассамблеяси навбатдаги сессиясининг асосий мавзуларидан бири сифатида белгилашни ҳамда ушбу масалаларга бағишланган Глобал саммитни ўтказишни таклиф қилди.
Шавкат Мирзиёев Ўзбекистон жаҳоннинг барча мамлакатлари билан кенг кўламли ва ўзаро манфаатли шерикликни, БМТ ва унинг институтлари билан амалий мулоқотни ривожлантириш учун доимо тайёр эканини таъкидлади.
