ВАРШАВА, 21 октябрь. /«Дунё» АА/. Ўзбек тили байрами куни муносабати билан Польшада ўзбек тилини ўрганаётган хорижликлар ва ушбу мамлакатда таҳсил олаётган ватандошларимиз байрам табрикларини йўлламоқда, деб хабар қилмоқда «Дунё» АА мухбири
Ян Око, Польша фуқароси:
- Мен хорижий тилларни жуда яхши кўраман. ?нглиз, немис, лотин, испан, украин ва рус тилларида гаплаша оламан.
Бундан уч йил аввал, мен ажойиб инсонларни учратдим. Ҳозир улар Польшада истиқомат қилади. Мен уларнинг тилини ўрганишга қарор қилдим. Бу инсонлар Ўзбекистондан эди ва уларнинг тили ўзбек тили эди.
Ўзбек тили менинг тилимдан жуда фарқ қилади. Мен ўзбек тилининг гўзаллигини, унинг товушлари ва оҳангини кашф эта бошладим.
Қадимги Буюк ипак йўлининг марказида яшовчи ўзбекларнинг маданияти ва тарихи нақадар жозибали эканини англадим. Менинг орзуим - бу тилда эркин ва соф мулоқот қилиш, ўзбек адабиётини кашф этиш ва ушбу гўзал мамлакатга сафар қилишдир.
21 октябрь — Ўзбек тили барайми куни муносабати билан барча ўзбекистонликларга энг эзгу тилакларимни йўлламоқчиман. Ажойиб туҳфа - тилингиз учун сизга катта раҳмат ва ҳамма йўналишларда сизга устунлик тилайман. Тилагим, ўз тилингизни ривожлантиринг ва уни халқаро тилга айлантиришдан асло чекингманг!
Азизбек Назаров, Варшавадаги ?қтисодиёт ва гуманитар фанлар университети талабаси:
- 1989 йил 21 октябрда, ғоят мураккаб ижтимоий-сиёсий шароитда юртимизда «Давлат тили ҳақида»ги қонуннинг қабул қилиниши миллий мустақиллик сари қўйилган муҳим қадам бўлгани барчамизга яхши маълум.
Президентимиз томонидан жамоатчилигимиз, халқимизнинг хоҳиш-истакларини инобатга олиб, ушбу тарихий санани Ўзбек тили байрами куни сифатида белгилаш тўғрисида қонун қабул қилинганидан ҳаммамиз мамнунмиз. Мамлакатимизда кенг нишонланаётган ана шу байрам маънавий ҳаётимиздан мустаҳкам ва муносиб ўрин олишига ишонамиз.
Неча асрлар оша аждодларимиздан бизга безавол ўтиб келаётган она тилимизнинг равнақи ва истиқболи ҳақида қайғуриш – бу миллатнинг ўзлигини англаши, унинг маънавий камолотини юксалтириш учун кураш демакдир. Давлат тилининг обрў-эътибори – бутун халқ, бутун жамиятнинг обрў-эътиборидир.
Ўзбек тили барча фуқароларнинг қаерда бўлишидан қатъий назар, уларнинг бирлиги, Ватанимизда ҳар бир инсоннинг ўрни муҳимлигини ифодалаб келмоқда.
