“Dunyo” AA/. Prezident Shavkat Mirziyoyev 26 dekabr kuni Sankt-Peterburg shahrida Rossiya Prezidenti Vladimir Putin tashabbusi bilan o‘tkazilgan MDHga aʼzo davlatlar rahbarlarining norasmiy sammitida ishtirok etdi, deb xabar bermoqda “Dunyo” AA muxbiri.
Davlatimiz rahbari matbuot xizmati maʼlumotiga ko‘ra, yetakchilar joriy yilgi hamkorlik yakunlarini sarhisob qilib, 2023 yil uchun ustuvor vazifalarni muhokama qildilar. Mintaqaviy va xalqaro ahamiyatga molik dolzarb masalalar yuzasidan fikr almashildi.
Bugun, 27 dekabr kuni Prezidentimiz MDH davlatlari rahbarlari bilan birgalikda Sankt-Peterburgdagi Davlat rus muzeyiga tashrif buyurdi. Bu yerda mehmonlar muzey to‘plamidagi eksponatlar va sanʼat asarlari bilan tanishdi hamda norasmiy uchrashuv o‘tkazdi.
Shu bilan davlatimiz rahbarining amaliy tashrifi yakunlandi, u “Pulkovo” xalqaro aeroportidan Toshkentga jo‘nab ketdi.
