/«Dunyo» AA/. O'zbekiston Prezidenti Shavkat Mirziyoyev Qatar Amiri shayx Tamim bin Hamad Ol Soniyning taklifiga binoan bugun davlat tashrifi bilan Doha shahriga keldi, deb xabar bermoqda «Dunyo» AA muxbiri.
Davlatimiz rahbari matbuot xizmati ma’lumotiga ko'ra, shayx Hamad nomidagi xalqaro aeroportida oliy martabali mehmon sharafiga faxriy qorovul saf tortdi.
O'zbekiston Prezidentini Qatar Bosh vaziri – tashqi ishlar vaziri shayx Muhammad bin Abdurahmon Ol Soniy va boshqa rasmiy shaxslar kutib oldi.
Davlat tashrifi dasturiga muvofiq, ertaga oliy darajadagi uchrashuvlar bo'lib o'tadi, yetakchilar O'zbekiston-Qatar munosabatlarini yanada mustahkamlash hamda ko'p qirrali hamkorlikni, eng avvalo, siyosiy, savdo-iqtisodiy, investitsiyaviy va madaniy-gumanitar sohalarda rivojlantirish masalalarini muhokama qiladilar.
Prezidentimiz Qatar ishbilarmon doiralari vakillari bilan uchrashuvlar o'tkazishi ham ko'zda tutilgan.
