ТОШКЕНТ, 5 февраль. /«Дунё» АА/. Мирзо-Улуғбек Элчиевич Абдусаломов Ўзбекистон Конституциявий судининг судьяси этиб сайланди, деб хабар бермоқда «Дунё» АА мухбири Ўзбекистон Олий Мажлиси Сенати маълумотига асосланиб.
Олий Мажлис Сенатининг ўн иккинчи ялпи мажлисида сенаторлар Ўзбекистон Республикаси Конституциявий суди таркибига ўзгартиришлар киритиш тўғрисидаги масалани ҳам кўриб чиқди.
Унга кўра, Ўзбекистон Конституциясининг 80-моддаси 2-бандига ва «Ўзбекистон Республикаси Олий Мажлисининг Сенати тўғрисида»ги Ўзбекистон Конституциявий қонуни 9-моддаси биринчи қисмининг 2-бандига мувофиқ, Мирзо-Улуғбек Элчиевич Абдусаломовни Ўзбекистон Конституциявий судининг судьяси этиб сайлаш тўғрисида Олий Мажлис Сенатининг қарори қабул қилинди.
Мирзо-Улуғбек Абдусаломов 1952 йил Сирдарё вилоятида туғилган. Тошкент давлат университетини тамомлаган. Мутахассислиги - ҳуқуқшунос, юридик фанлар номзоди. Ўзбекистонда хизмат кўрсатган юрист.
1995-2004 йиллар мобайнида Ўзбекистон Республикаси Олий хўжалик судининг раиси, 2004-2005 йилларда Ўзбекистон Республикаси Конституциявий суди раиси бўлиб ишлаган.
У 2005 йил 7 майдан буён Ўзбекистон Республикаси Марказий сайлов комиссиясининг раиси лавозимида фаолият юритиб келаётган эди.
