ТОШКЕНТ, 17 январь. /«Дунё» АА/. Ўзбекистон ва Туркия тарихий фильмларида суратга тушган таниқли актёр Нурмуҳаммад Ҳусниддинов (Алихон) «Янги Ўзбекистон ва миллий кинематография» ойлиги тадбирлари доирасида «Дунё» АА мухбирига ўзбек киносининг бугунги ютуқлари ва дозарб масалалари хусусида ўз фикр-мулоҳазаларини сўзлаб берди.
— Сўнгги йилларда режиссёрларимиз томонидан суратга олинаётган фильмларни қандай баҳолайсиз?
— Бугун ўзбек киноси яна ривож топа бошлади, деб ҳисоблайман.
Масалан, 2020 йил премьераси бўлиб ўтган “Рангсиз тушлар”, “Фариданинг икки минг қўшиғи” фильмлари, жорий йил премьераси кутилаётган “Мендирман Жалолиддин” сериали сўзимни тасдиқлайди, десам муболаға бўлмайди.
Жалолиддин Мангуберди ҳақидаги фильм Туркияда суратга олинди, шу сабабли ўзбекистонлик актёрлар, жумладан мен ҳам, бир йил давомида ушбу мамлакатда бўлиб туриб, туркиялик ҳамкасблар билан тажриба алмашдик, маҳоратимизни оширишга ҳаракат қилдик.
— Бугунги кунда суратга олинаётган қайси фильмда режиссёрлик иши яққол намоён бўлган дея оласиз?
— Кўпчилик яхши кино суратга тушириш учун катта маблағ керак, деб ўйлайди. Мен ҳам яқингача шундай ҳисоблар эдим, лекин кейинги пайтда бу фикрим ўзгарди. Ушбу жараёнда маҳоратли режиссёрлик иши жуда ҳам катта роль ўйнайди. Мен ўзим учун ана шундай режиссёрни кашф қилдим. Бу "Мен террорчи эмасман" фильми режисёри Муҳаммадали ?скандаровдир.
Кино ихлосмандларига маслаҳатим - ушбу фильм намойишига, албатта, тушинг ва сиз мен нега бундай фикрга келганимни тушунасиз.
— Ўзбек кинофильмларининг халқаро кинофестивалларда муваффақият қозониши учун нималарга кўпроқ эътибор бериш керак, деб ўйлайсиз?
— Мен бир неча йил аввал Голливуд актёри Армана Санте билан шу ҳақда фикр алмашгандим. У “яхши фильм суратга олиш учун учта муҳим нарса бор: биринчиси – сценарий, иккинчиси ҳам сценарий, учинчиси ҳам сценарий”, деган эди.
Бу билан нима демоқчиман? Мен ҳам, авваламбор, сценарий пухта бўлиши лозим, шундагина мазмунли ва мантиқли фильм яратиш мумкин, деб ҳисоблайман. Суратга олинаётган фильмга ҳар томонлама професссионал ёндашилса, кино олами вакиллари ва мухлислар эътиборини торта олиш мумкин. Яна қўшимча қилмоқчиманки, ватанпарварлик руҳидаги фильмларни кўпроқ суратга олишимиз керак, чунки бу ёшлар тарбиясида жуда ҳам катта аҳамиятга эга.
— Маҳоратли режиссёр, актёр, оператор ва бошқа мутахассисларни тайёрлаш бўйича фикрларингизни билишни истардик.
— Мен АҚШда 10 йил яшаб, актёрлик касби бўйича сабоқ олдим, тил ўргандим, меҳнат қилдим. Ўз тажрибамдан келиб чиқиб бир нарсага амин бўлдимки, инсон ҳар қандай соҳада ҳам яхши мутахасис бўламан деб ният қилса, албатта, бу борадаги халқаро тажрибани ўрганиши, ўз малакасини халқаро талаблар даражасида ошириб боришга ҳаракат қилиши керак.
Бугун мамлакатимизда ёшларнинг етук мутахассислар бўлиб етишиши учун, жумладан, кино соҳасида ҳам, кенг имкониятлар яратилмоқда. Халқаро кўламдаги илғор тажрибани ўзлаштириш эса ривожланишнинг янги босқичига чиқиш учун яхши туртки бўлади.
Яна бир нарсани хоҳлардимки, кино санъати учун муҳим мутахассислар бўлган гримёрдан тортиб чироқ усталаригача бўлган барча-барча ишчиларни алоҳида муносабат билан ва индивидуал тарзда тайёрланса мақсадга мувофиқ бўларди.
