ТОШКЕНТ, 29 октябрь. /«Дунё» АА/. Бугун Марказий сайлов комиссиясининг навбатдаги йиғилиши бўлиб ўтди, деб хабар қилмоқда «Дунё» АА мухбири.
Комиссия раиси Зайниддин Низамходжаев бошқарган мажлисда 2021 йил 24 октябрь куни ўтказилган Ўзбекистон Республикаси Президенти сайлови натижалари тўғрисидаги масала кўриб чиқилди.
Қайд этилганидек, пандемия туфайли юзага келган мураккаб шароитга қарамасдан, карантин қоидаларига амал қилган ҳолда Президент сайловида 16 миллион 212 минг 343 ёки 80,4 фоиз сайловчи ўз хоҳиш-иродасини эркин ифода этиб, ўзи муносиб деб билган номзодга овоз берди.
Президент сайловини катта қизиқиш билан кузатиб ва ўрганиб борган халқаро ташкилотларнинг миссиялари, хорижий давлатларнинг мингга яқин кузатувчилари, юзлаб чет эллик журналистлар томонидан мамлакатимиз сайлов қонунчилиги ва амалиётида қисқа муддат ичида амалга оширилган муҳим ўзгаришлар алоҳида эътироф этилди.
Мажлисда Ўзбекистон Республикаси Президенти сайловини ўтказувчи округ сайлов комиссияларининг баённомалари Марказий сайлов комиссияси аъзолари томонидан ўрганиб чиқилди. Ўрганиш натижасида мазкур баённомалар Сайлов кодекси ҳамда Марказий сайлов комиссиясининг 2021 йил 14 апрелдаги Ўзбекистон Республикаси Президенти сайловини ўтказувчи округ сайлов комиссияларининг фаолияти тартиби тўғрисидаги Низом талабларига тўлиқ амал қилган ҳолда расмийлаштирилган, деб топилди.
Мажлис сўнггида комиссия аъзолари 2021 йил 24 октябрь куни ўтказилган Ўзбекистон Республикаси Президенти сайлови натижаларини аниқлаш тўғрисидаги баённомани тасдиқлади.
Шунингдек, мажлисда Марказий сайлов комиссияси томонидан Президент сайлови бўйича якуний натижалар эълон қилинди.
Овоз беришда иштирок этган сайловчилар томонидан ҳар бир номзодни ёқлаб берилган овозлар сони қуйидагича бўлди:
Тадбиркорлар ва ишбилармонлар ҳаракати – Ўзбекистон Либерал-демократик партиясидан номзод Шавкат Мирзиёевга – 12 миллион 988 минг 964 нафар ёки овоз беришда иштирок этган сайловчиларнинг 80,12 фоизи;
Ўзбекистон халқ демократик партиясидан номзод Мақсуда Ворисовага – 1 миллион 75 минг 16 нафар ёки овоз беришда иштирок этган сайловчиларнинг 6,63 фоиз;
Ўзбекистон “Миллий тикланиш” демократик партиясидан номзод Алишер Қодировга – 888 минг 515 нафар ёки овоз беришда иштирок этган сайловчиларнинг 5,48 фоизи;
Ўзбекистон Экологик партиясидан номзод Нарзулло Обломуродовга – 670 минг 641 нафар ёки овоз беришда иштирок этган сайловчиларнинг 4,14 фоизи;
Ўзбекистон “Адолат” социал-демократик партиясидан номзод Баҳром Абдуҳалимовга – 549 минг 766 нафар ёки овоз беришда иштирок этган сайловчиларнинг 3,39 фоизи.
Ҳақиқий эмас деб топилган сайлов бюллетенларининг сони – 39 минг 443 тани ёки 0,24 фоизни, фойдаланилмаган ва бузиб қўйилиб, бекор қилинган сайлов бюллетенларининг умумий сони – 4 миллион 47 минг 358 тани ташкил қилган.
