КУАЛА-ЛУМПУР, 26 декабрь. /«Дунё» АА/. Осиё-Тинч океани технологиялар ва инновациялар университети ректори Хари Нарайанан (Малайзия) «Дунё» АА учун интервьюсида Қашқадарё вилоятида бунёд этилган «Uzbekistan GTL» заводи имкониятлари ва унинг мамлакат иқтисодиётига қўшадиган улуши ҳақидаги фикрларини билдирди.
- Аввало, Ўзбекистонда Марказий Осиёдаги энг йирик ишлаб чиқариш лойиҳасига айланган биринчи синтетик суюқ ёқилғи ишлаб чиқариш заводи очилгани муносабати билан самимий қутловларимни йўллайман.
Президент Шавкат Мирзиёев ташаббуси қисқа вақт ичида амалиётга жорий қилинди. Ушбу йирик лойиҳа келгусида мамлакатнинг табиий газни чуқур қайта ишлаш салоҳиятини янада кенгайтиришга хизмат қилади. Энг муҳими, амалга оширилган изчил чора-тадбирлар самарасида мазкур кенг кўламли мажмуада пандемия шароитида ҳам қурилиш ишлари бир сония бўлсада тўхташига йўл қўйилмади.
«Uzbekistan GTL» заводида ишлаб чиқариладиган маҳсулотлар, айниқса, Ўзбекистоннинг ёқилғи-энергетика мустақиллигини таъминлаш ва ошириш, жумладан, углеводород хом-ашёси импортини кескин камайтириш, ички бозорни юқори сифатли ҳамда экологик тоза ёқилғи билан таъминлашда стратегик аҳамиятга эга бўлади, деб ҳисоблайман.
