“Dunyo” AA/. Mamlakatimiz Bosh konsulxonasida Oliy Majlis Qonunchilik palatasi Spikerining birinchi o‘rinbosari, Konstitutsiyaga o‘zgartirish kiritish yuzasidan Konstitutsiyaviy komissiya raisi Akmal Saidov bilan BAAda mehnat faoliyati bilan shug‘ullanayotgan vatandoshlarimiz ishtirokida Bosh qomusimizga kiritilayotgan o‘zgartish va qo‘shimchalarning mazmun-mohiyatiga bag‘ishlangan davra suhbati o‘tkazildi, deb xabar bermoqda “Dunyo” AA muxbiri.
Konstitutsiyaviy komissiya raisi Akmal Saidov ishtirokchilarga so‘nggi yillarda respublikamizda amalga oshirilayotgan keng ko‘lamli islohotlar, O‘zbekiston Konstitutsiyasiga kiritish taklif etilayotgan o‘zgartish va qo‘shimchalarning mazmun-mohiyati, Samarqandda o‘tkazilgan SHHT sammiti yakunlari to‘g‘risida so‘zlab berdi.
-Taklif etilayotgan o‘zgartish va qo‘shimchalar umumxalq muhokamasidan o‘tkazildi, ular, shuningdek, Konstitutsiyaviy komissiya tomonidan batafsil tahlil qilinganidan keyin eng maqbullari Bosh qomusimizga kiritiladi, - dedi – Akmal Saidov. - Yurtdoshlarimizning hohish-istaklari “meningkonstitutsiyam.uz” portali orqali qabul qilindi.
Davra suhbati ishtirokchilari konstitutsiyaviy islohotlarga oid barcha savollariga Komissiya raisidan javob oldi.
Bo‘lib o‘tgan muloqot yakunida BAAda istiqomat qilayotgan vatandoshlar O‘zbekistonda amalga oshirilayotgan o‘zgarishlar, xususan, konstitutsiyaviy islohotlarni qo‘llab-quvvatlash bo‘yicha yakdil ekanliklarini bildirdi.