ТОШКЕНТ, 8 июль. /«Дунё» АА/. Кеча Ўзбекистон кинематография агентлигида Мисрнинг Ўзбекистондаги элчиси Амира Фаҳми билан учрашув ташкил этилди, деб хабар бермоқда «Дунё» АА мухбири агентлик маълумотига таяниб.
Учрашувда Тошкент халқаро кинофестивалини ўтказишдаги ҳамкорлик ва мисрлик киноижодкорлар билан ко-продукция фильмларини яратиш масалалари муҳокама қилинди.
Шунингдек, Миср фильмларини Ўзбекистон телеканаллари, ўзбек фильмларини эса Миср телеканаллари орқали намойиш этишга келишилди. Томонлар бу борада амалга оширилиши кутилаётган ишларга батафсил тўхталиб ўтди.
Бундан ташқари, учрашувда Ўзбекистон маданий меросини ўрганиш, сақлаш ва оммалаштириш Бутунжаҳон жамияти билан Миср элчихонаси ўртасидаги ҳамкорлик масалаларига ҳам тўхталди.
Бутунжаҳон жамияти томонидан сентябрда ўтказиладиган конференцияга Мисрдан ҳам олимларни жалб қилиш, шу билан бирга Мисрда сақланаётган Ўзбекистон маданиятига оид ёдгорликлар бўйича китоблар тўпламини чоп этиш ташаббуси илгари сурилди.
