СЕУЛ, 25 июнь. /«Дунё» АА/. Ўзбекистон Республикасининг ?нвестициялар ва ташқи савдо вазирлиги мутасаддилари билан Жанубий Кореянинг «MBC Rental» компанияси вакиллари иштирокида видеоконференция шаклида музокаралар ўтказилди, деб хабар бермоқда “Дунё” АА мухбири.
Тадбир мамлакатимизнинг Корея Республикасидаги элчихонаси кўмагида ташкил этилди. Унда вазирлик ҳузуридаги ?нвестиция лойиҳаларини ишлаб чиқиш маркази ва Хорижий инвестицияларни жалб этиш агентлиги масъул ходимлари ҳам иштирок этди.
Онлайн музокараларда Хоразм вилоятида тижорат совитиш ускуналарини (совитиш витринаси, музлаткичлар) ишлаб чиқариш инвестиция лойиҳасини амалга ошириш истиқболлари муҳокама қилинди.
«MBC Rental» компаниясининг катта ижрочи директори Чонг Жин Чоль ушбу лойиҳани рўёбга чиқаришдан манфаатдор эканини билдирди. Компания тижорат ва умумий овқатланиш, таълим ва давлат идоралари учун мўлжалланган совитиш ускуналари соҳасида 20 йиллик тажрибага эга эканини маълум қилди.
Жанубий Корея компанияси вакилларига мамлакатимизда инвесторлар учун яратилган шароит, совитиш ускуналарини ишлаб чиқариш истиқболлари, Хоразмда лойиҳани амалга оширишнинг ташкилий жиҳатлари ҳақида батафсил маълумот берилди.
Ўз навбатида, Чонг Жин Чоль мамлакатимизда тижорат совитиш ускуналарини ишлаб чиқариш лойиҳаси имкониятларини амалий ўрганишни бошлашни таклиф қилди.
Томонлар ахборот алмашинувини узвий давом эттириш ва видеоконференция шаклидаги музокараларни ташкил қилишда келишувга эришди.
