ФРAНКФУРТ-МАЙН, 1 февраль, /"Дунё" АА/. Германиядан Ўзбекистонга сафар қилаётган сайёҳлар оқими ошмоқда, деб хабар бермоқда «Дунё» АА мухбири.
Бунда ушбу мамлакат сайёҳлик компаниялари саъй-ҳаракатларининг ҳам ўрни бор.
Кёльн шаҳрида жойлашган «REWE Group» чакана савдо тармоғи «Focus» журнали билан ҳамкорликда Ўзбекистоннинг сайёҳлик салоҳиятига бағишланган рангтасвирли брошюра нашр қилди.
Немис сайёҳлари учун мўлжалланган нашрда Буюк ипак йўлида жойлашган Тошкент, Самарқанд, Шаҳрисабз ва Бухоро шаҳарларига бир ҳафталик саёҳат тақдим этилган.
«REWE Group» савдо тармоғи шу йилнинг январь ойидан бошлаб ўз супермаркетларида «Usbekistan Rundreise – Geheimnisse der Seidenstraße» деб номланган реклама брошюрасини тарқатмоқда.
Таъкидлаш жоизки, сўнгги йилларда мамлакатларимиз ўртасидаги сайёҳлик соҳасидаги алоқалар жадал ривожланмоқда. Бунинг самарасида Германиядан Ўзбекистонга келаётган сайёҳлар сони 4 баравар кўпайди. Германия фуқаролари учун 30 кунлик визасиз режим жорий этилгани немис сайёҳлари сонининг кўпайишига ижобий таъсир кўрмоқда.
