ТОШКЕНТ, 5 май. /“Дунё” АА/. Бугун коронавирусдан тузалиш билан боғлиқ илк хушхабар Бухоро вилоятидан маълум қилинди. Қайд этилишича, у ерда навбатдаги 35 нафар бемор коронавирусдан тўлиқ соғайди, деб хабар бермоқда “Дунё” АА мухбири Соғлиқни сақлаш вазирлиги манбасига асосланиб.
Шифо топганларнинг 20 нафари Россиядан чартер рейс билан Бухорога олиб келинган ва карантинга олинган. Коронавирус инфекцияси тасдиқлангач, шифохонага жойлаштирилган. Қолган 15 нафари эса коронавирусга чалинганлар билан мулоқотда бўлиб, касалликни юқтириб олган Уларнинг энг ёши каттаси 83 ёшли отахон бўлса, энг ёши кичиги 4 ёшли бола.
Бухоро вилоятида асосан хорижий давлатлардан чартер рейслар билан олиб келинган фуқароларимиз орасида коронавирус инфекциясига чалиниб даволанаётган 434 нафар бемордан 367 нафари бутунлай соғайди. Айни пайтда қолган 67 нафар бемор даволанмоқда.
Шунингдек, Самарқанд вилоятида 10 нафар, Тошкент шаҳридаги Вирусология илмий-текшириш институти клиникасида 4 нафар, жами 14 нафар коронавирус инфекциясига чалинган бемор бутунлай соғайиб, реабилитацияга кузатилди.
Самарқандда тузалганларнинг барчаси ушбу вилоятдан бўлиб, коронавирус инфекциясига чалинганлар билан мулоқот орқали касалликни юқтириб олишган.
Куннинг иккинчи ярмида Фарғона вилоятда бир йўла 47 нафар коронавирус инфекциясига чалинган бемор соғайди ва реабилитацияга кузатилди.
Шифо топганларнинг 11 нафари Россияда бўлиб қайтган, яна 11 нафари эса Туркиядан чартер рейсида Фарғонага олиб келинган ва карантинга олинган. Яна 1 нафар фуқаро Қирғизистон Республикасидан кириб келган. Уларда коронавирус инфекцияси тасдиқлангач, шифохонага жойлаштирилган. Қолган 24 нафари эса коронавирусга чалинганлар билан мулоқотда бўлиб, касалликни юқтириб олишган.
Шундай қилиб, бугун соат 21:00 ҳолатига кўра, мамлакатимизда 96 нафар бемор тузалиб, коронавирус инфекциясидан соғайганлар 1 минг 501 нафарни ташкил этмоқда.
