АҚШнинг мамлакатимизда дипломатик миссиясини якунлаётган Фавқулодда ва Мухтор элчиси Дэниел Розенблюм Сенат раиси билан учрашувда бундан кейин ҳам Ўзбекистонда амалга оширилаётган изчил ислоҳотларни ҳар томонлама қўллаб-қувватлашини билдирди
ТОШКЕНТ, 7 сентябрь. /“Дунё” АА/. Кеча Ўзбекистон Республикаси Олий Мажлиси Сенати раиси Танзила Норбоева Америка Қўшма Штатларининг мамлакатимизда дипломатик миссиясини якунлаётган Фавқулодда ва Мухтор элчиси Дэниел Розенблюмни қабул қилди, деб хабар бермоқда “Дунё” АА мухбири.
Ўзбекистон Республикаси Олий Мажлиси Сенатининг Ахборот хизматидан маълум қилинишича, Сенат раиси Дэниел Розенблюмни «Дўстлик» ордени билан тақдирлангани билан табриклади.
Учрашув чоғида икки томонлама ҳамкорлик, шу жумладан, АҚШ Конгресси Сенати ва Ўзбекистон Республикаси Олий Мажлиси Сенати ўртасидаги муносабатларни мустаҳкамлаш ва ривожлантириш масалалари юзасидан фикр алмашилди.
Суҳбат давомида элчининг юртимиздаги фаолияти сермаҳсул бўлганлиги ҳамда унинг Ўзбекистон-Америка стратегик шериклик муносабатларини ривожлантиришга қўшган ҳиссаси алоҳида эътироф этилди.
Ўз навбатида, Д.Розенблюм дипломатик фаолиятини амалга оширишда барча даражада, хусусан, парламент билан самарали ҳамкорлик учун ўз миннатдорчилигини билдириб, бундан кейин ҳам Ўзбекистонда амалга оширилаётган изчил ислоҳотларни ҳар томонлама қўллаб-қувватлашини айтиб ўтди.
