ТОШКЕНТ, 28 июнь. /«Дунё» АА/. Ўзбекистон кинематография агентлиги буюртмасига биноан «Ёшлик киностудияси» ДУК томонидан суратга олинган, «Дебют-2020» ёшлар киноальманахидаги 18 та фильмлардан бири бўлган «Чана» қисқа метражли фильми Буюк Британиянинг Бунтингфорд шаҳрида ўтказилган қисқа метражли фильмлар фестивалида махсус диплом билан мукофотланди, деб хабар бермоқда «Дунё» АА мухбири агентлик маълумотига таяниб.
Мазкур кинофестиваль асосан талабалар учун мўлжалланган бўлиб, унда турли жанрдаги қисқа метражли фильмлар баҳоланади. Профессионал ва ҳаваскорлик даражасидаги кинокартиналар кўриб чиқилади.
“Чана” фильмининг сценарий муаллифи ва постановкачи режиссёр Суҳроб Қодиров, постановкачи оператор Нортой Йўлдошев, рассом Алишер Тўлабоев, композитор Убайдулло Каримов, иккинчи режиссёр Дилшод Усмонов, бадиий раҳбар Шуҳрат Ризаев.
Маълумот учун, мазкур фильм жорий йилнинг 1-5 июнь кунлари Россиянинг Ярославль шаҳрида бўлиб ўтган «Свет миру» халқаро ёшлар кинофестивалида ҳам махсус диплом билан мукофотланган эди.
