ТОШКЕНТ, 29 май. / “Дунё” АА/. Бугун бир гуруҳ юртдошларимиз “Uzbekistan Airways” АЖ чартер рейси билан Москвадан Тошкентга учиб келмоқда, деб хабар бермоқда “Дунё” АА мухбири.
Ўзбекистоннинг Россиядаги элчихонаси берган хабарга кўра, самолёт бортида 257 нафар йўловчи бор.
Дипломатия ваколатхонасининг маълум қилишича, 30 майдан 7 июнгача бўлган вақт мобайнида Москва – Тошкент – Москва йўналиши бўйича яна 4 та чартер рейс, шунингдек, яна иккита рейс Санкт-Петербург ва Новосибирск шаҳарларидаги ватандошларимизни олиб келиш учун ташкил этилиши кутилмоқда.
29 май ҳолатига кўра Россияда 387 минг 623 кишининг коронавирусга чалингани рўйхатга олинган, жумладан, сўнгги бир кеча-кундузда 8 минг 572 киши вирус юқтиргани аниқланган. Пандемия бошлангандан буён 159 минг 257 нафар инсон буткул соғайган. Вафот этганлар сони эса 4 минг 374 тани ташкил этмоқда.
