ТОШКЕНТ, 2 февраль. /«Дунё» АА/. «Ўзбеккино» миллий агентлиги буюртмасига биноан «Сinema of Сentral Аsia» киностудияси томонидан «Узбечка» («Ўзбек қизи») бадиий фильми суратга олинади, деб хабар бермоқда «Дунё» АА мухбири агентлик маълумотига таяниб.
Мазкур фильм ўзбек снайпер қизининг ?ккинчи жаҳон урушида кўрсатган жасорати ва бошидан кечирганлари ҳақида ҳикоя қилади. Шунингдек, аёлларнинг фронтга жалб этилиши, урушдаги қийинчиликлари гавдалантирилади. Режиссёрнинг фикрича, мазкур картина Зебо Ғаниева каби урушда мардонавор жанг қилган аёлларга бағишланади.
Тасвирга олиш жараёнлари Тошкент вилояти ҳамда Беларусда бўлиб ўтиши режалаштирилган. Фильмнинг постановкачи режиссёри Акбар Бектурдиев Беларусда ижодий сафарда бўлиб қайтди. Фильм воқеаларининг асосий қисми ушбу давлатда содир бўлади. Ҳозирда кастинг жараёнларига тайёргарлик ҳамда ижодий гуруҳ томонидан тасвирга олиш жойлари кўздан кечирилмоқда.
