ВАШ?НГТОН, 25 сентябрь. /«Дунё» АА/. АҚШ Халқаро алоқалар кенгаши аъзоси, Солиқлар ва инвестициялар халқаро маркази катта тадқиқотчи ходими Ариэль Коэн «Дунё» АА мухбирига Ўзбекистон Президенти Шавкат Мирзиёевнинг БМТ Бош Ассамблеясининг 75-сессиясидаги нутқи ҳақидаги фикр-мулоҳазалари ҳақида сўзлаб берди.
- Мен Президент Шавкат Мирзиёевнинг Covid-19 пандемияси сабабли БМТ Бош Ассамблеясининг тарихида биринчи марта видеоконференцалоқа форматида ташкил этилган тадбирда сўзлаган нутқини диққат-эътибор билан тингладим. Шунингдек, давлат раҳбари БМТда илк маротаба ўзбек тилида ўта муҳим бўлган чиқиш қилди ва камина унинг айтганларини катта аҳамиятга эгалигига амин бўлдим.
Биринчидан, Ўзбекистон етакчиси ахборот технологиялари, транспорт тизимлари ва глобал таъминот занжирлари ўзаро жипс боғланган XXI асрда ўз халқининг фаровонлиги учун ўта муҳим бўлган кенг миқёсли иқтисодий ислоҳотларга содиқлигини кўрсатди. Шу нуқтаи назардан, Ўзбекистоннинг дунё ҳамжамиятига тақдим этадиган нарсалари жуда кўп. Хусусан, мамлакат дунёнинг энг йирик пахта ишлаб чиқарувчилардан биридир. Қачонлардир мавжуд бўлган мажбурий меҳнат ва болалар меҳнатидан фойдаланиш муаммолари буткул тугатилди. Бу эса дунёнинг таниқли кийим-кечак брендларига ўзбек пахта толасини сотиб олиш имкониятини очиб берди.
?ккинчидан, Ўзбекистонда билимга чанқоқ, кучли ва серғайрат ёш йигит-қизлар тарбияланмоқда. Айнан улар сўнгги пайтларда мамлакатда ўз бизнесини бошлаган ва янги лойиҳаларни режалаштираётган инвесторлар учун малакали ишчи кучига айланади.
Учинчидан, Ўзбекистоннинг Марказий Осиёдаги стратегик жойлашувига эътибор қаратмоқчиман. Мамлакатингиз Афғонистондаги тинчлик ташаббусларини қўллаб-қувватламоқда ва барча томонлар билан музокаралар олиб бормоқда. Ўзбекистон, шунингдек, минтақадаги интеграциялашув жараёнининг янада кенгайиши йўлида саъй-ҳаракатлар қилмоқда. «Бир макон, бир йўл» ташаббуси, АҚШнинг Халқаро тараққиётни молиялаштириш корпорацияси, Жаҳон банки, Европа тикланиш ва тараққиёт банки, Осиё тараққиёт банки каби халқаро молия институтлари билан ҳамкорлик натижасида Ўзбекистон зарур техникавий экспертиза ва маблағлар олмоқда.
Тўртинчидан, Ўзбекистон Президенти иқлим ўзгариши, Орол денгизи фожиаси, ушбу экологик фалокат оқибатларини бартараф этиш йўлида қилинаётган ишларга тўхталди. Менимча, бу бутун дунё учун катта муаммо, чунки Орол денгизи қуриши сабабли денгиз тубидаги заҳарли туз ва бошқа кимёвий чанглар Антарктида ва Жанубий Америкагача етиб бормоқда. Шу боис барчамиз Орол денгизининг иқлимий фалокати оқибатларини бартараф этиш устида биргаликда ишлашимиз керак.
Ваниҳоят, мен ЮНEСКО томонидан эътироф этилган ?нсониятнинг номоддий маданий мероси объектлари рўйхатига киритилган, миллионлаб сайёҳлар билан гавжум Самарқанд, Бухоро ва Хиванинг ажойиб тарихи ва маданиятини эслатиб ўтмоқчиман. Фикримча, ушбу жиҳат фахр туйғуси бўлиши билан бирга а Ўзбекистонда меҳмондўстлик соҳасини янада ривожлантириш манбаи бўлиб хизмат қилади.
Шундай қилиб, Президент томонидан белгиланган иқтисодий ислоҳотларни ҳаётга тадбиқ этиш, коррупцияга қарши курашиш, таълим даражасини юксалтириш, ёшлар муаммоларини ҳал этиш йўлида одимлаётган Ўзбекистонни порлоқ келажак кутмоқда. Бу келажакни бутун халқаро ҳамжамият, шу жумладан АҚШ ҳам мамнуният билан қўллаб-қувватлайди.
