ВАШ?НГТОН, 30 июнь. /«Дунё» АА/. АҚШ ва Канадада вақтинча бўлиб турган ва коронавирус пандемияси туфайли қийин аҳволга тушиб қолган Ўзбекистон фуқароларининг қайтиб келишини таъминлаш мақсадида жорий йилнинг 26 ва 28 июнь кунлари “Uzbekistan Airways” авиакомпаниясига тегишли самолётда “Тошкент-Нью-Йорк-Тошкент” йўналиши бўйича иккита чартер рейс ташкил қилинди, деб хабар бермоқда «Дунё» АА мухбири.
Ўзбекистоннинг Вашингтондаги элчихонаси ва Нью-Йоркдаги Бош консуллиги маълумотларига кўра, мамлакатимизнинг 1 минг 28 фуқароси дипломатик ваколатхоналарга мурожаат қилиб, Ўзбекистонга қайтиш истагини билдирган. Ҳукумат комиссияси талабларидан келиб чиққан ҳолда, алмашув дастурлари бўйича ушбу мамлакатларда аккредитация қилинган, истиқомат қилувчилар, стажёрлар, ўқувчилар ва талабалар, Ўзбекистон давлат муассасалари ходимлари, сайёҳлар, беморлар ва уларга ҳамроҳ шахслар, АҚШ ва Канадага юборилган кекса одамлар, шунингдек, ушбу мамлакатларда яшаш ҳуқуқига эга бўлган фуқаролар ва уларнинг вояга етмаган фарзандлари биринчи галда ватанга қайтувчи шахслар сифатида танланди.
Дипломатик ваколатхонамиз маълумотига кўра, 511 йўловчи Ўзбекистонга махсус чартер рейслар билан жўнаб кетган, уларнинг 503 нафари Ўзбекистон фуқароси, шундан 9 нафари янги туғилган чақалоқлардир. Қолган 8 нафар йўловчи АҚШнинг Тошкентдаги элчихонаси дипломатик ходимларидир. Шу билан бирга, Ўзбекистонга олиб кетилишини сўраган ватандошларимизнинг 247 нафари чартер рейсларда қайтишдан бош тортди, 147 нафар ватандош билан боғланиш имконияти бўлмади. Шу йилнинг 25 ва 26 июнь кунлари мамлакатга қайтиш истагида мурожаат қилган 95 нафар фуқаро шакллантирилган рўйхатга киритилди ва навбатдаги чартер рейс билан Ўзбекистонга учиб кетишлари таъминланади.
Аввалроқ, мамлакатимизнинг АҚШдаги дипломатик ваколатхоналари саъй-ҳаракатлари билан мамлакатимизнинг 28 фуқароси АҚШ ва Кубадан ?станбул, Дубай, Лондон ва Сеул шаҳарлари орқали “Uzbekistan Airways” авиакомпаниясининг махсус чартер рейсларида Тошкентга жўнатилган эди.
Нью-Йоркдаги Жон Кеннеди аэропортида “Нью-Йорк-Тошкент” йўналишида чартер рейсларни ташкил этишда шаффофликни таъминлаш мақсадида маҳаллий ОАВ вакиллари ва блогерлар ўз манбалари орқали ватандошларимизнинг жўнашлари жараёнини кенг ёритиб боришди.
Шунингдек, бир қатор ватандошлар "Америка Овози"га берган интервьюларида чет элда фуқароларимизга доимий ғамхўрлик кўрсатилаётгани, Американинг географик жиҳатдан узоқлиги ва оғир эпидемиологик вазиятга қарамай, Ўзбекистонга ўз вақтида чартер рейслар ташкил этилаётгани учун ҳукуматимизга самимий миннатдорлик билдирди. Хусусан, Самарқанд вилоятида туғилган Сафарали Хасанов Ўзбекистоннинг АҚШдаги дипломатик ваколатхоналари ватандошларимизни қайтариш бўйича фаол чоралар кўраётганини, мамлакатга чиқиш рейсларини тузишда ва фуқароларни "Uzbekistan Airways" авиакомпанияси чартер рейсларида рўйхатдан ўтказишда тўлиқ шаффофликни таъминлаганини таъкидлади.
Шу билан бирга, Вашингтон ва Нью-Йоркдаги консуллик идораларимиз "Uzbekistan Airways"нинг АҚШга мунтазам рейсларни вақтинча тўхтатиши муносабати билан яқин ойларда Ўзбекистонга сафар қилишни режалаштираётган Америка ва Канадада истиқомат қилувчи фуқароларга коронавирус билан боғлиқ вазият яхшилангунга қадар саёҳатларини кейинга суришни маслаҳат бермоқда. Агар бунинг иложи бўлмаса, фуқаролар АҚШдан Ўзбекистонга ташкил қилинадиган чартер рейслар рўйхатига киритиш учун элчихона ёки Бош консулликка мурожаат қилишлари керак. Консуллик ходимларнинг алоқа маълумотлари эса дипломатик ваколатхоналаримиз веб-сайтларида мавжуд.
