/“Dunyo” AA/. O‘zbekiston Markaziy saylov komissiyasining muddatidan ilgari Prezident saylovlariga tayyorgarlik ko‘rish va o‘tkazish bo‘yicha navbatdagi majlisi bo‘lib o‘tdi, deb xabar bermoqda “Dunyo” AA muxbiri.
Majlisni MSK raisi Zayniddin Nizamxodjayev olib bordi.
MSK maʼlumotiga ko‘ra, majlisda Ommaviy axborot vositalari (OAV) vakillarini akkreditatsiyadan o‘tkazish to‘g‘risidagi masala ko‘rib chiqildi.
MSKga kelib tushgan murojaatlardan kelib chiqib, 6 ta mahalliy OAVning 54 nafar vakili akkreditatsiyadan o‘tkazildi.
OAV vakillarining vakolat muddati unga akkreditatsiyadan o‘tganligi to‘g‘risidagi guvohnoma berilgan kundan boshlanishi va saylov yakunlari rasman eʼlon qilingan kuni tugashi, MSK tomonidan tasdiqlangan kalendar rejaga muvofiq OAV 20 maydan boshlab, saylovga kechi bilan o‘n kun qolgunga qadar MSKga o‘z vakillarini akkreditatsiyadan o‘tkazish to‘g‘risida murojaat qilishlari mumkinligi belgilab qo‘yilgan.
MSKga turli OAVlaridan akkreditatsiyadan o‘tkazish haqidagi murojaatlar kelib tushishi davom etmoqda. Mazkur murojaatlar Markaziy saylov komissiyasi Matbuot xizmati tomonidan batafsil o‘rganib chiqilmoqda. Taqdim etilgan hujjatlarda ularni akkreditatsiyadan o‘tkazish uchun monelik qiladigan holatlar aniqlanmasa, hujjatlar belgilangan tartibda to‘liq taqdim etilgan bo‘lsa MSK tomonidan qaror bilan akkreditatsiyadan o‘tkaziladi.