Яна бир Нидерландия компанияси Ўзбекистон меваларини импорт қилишга қизиқиш билдирди

26.06.2020 12:05

АМСТEРДАМ, 26 июнь. /«Дунё» АА/. Ўзбекистонинг Бенилюкс мамлакатларидаги элчихонаси вакиллари Нидерландиянинг “Baumanfruit b.v.” компаниясида бўлиб, унинг фаолияти билан танишди ва корхона раҳбари Антон Бауман билан музокаралар ўтказди, деб хабар бермоқда “Дунё” АА мухбири.

“Baumanfruit b.v.” компанияси 1947 йилда ташкил этилган бўлиб, янги узилган меваларнинг Нидерландияга йирик импортёрларидан бири ҳисобланади. Корхонада умумий сиғими 3,5 минг тоннага тенг совуткич бор. Компаниянинг йиллик савдо айланмаси 25 миллион еврони ташкил қилади. “Baumanfruit b.v.” яқин вақтгача цитрус меваларни Нидерландияга импорт қилувчи йирик импорт қилувчилардан бири эди.

Сўнгги икки йил ичида компания импорт қилинадиган маҳсулотлар турини кенгайтира бошлагани боис энди унда Ўзбекистон каби янги бозорларга қизиқиш ҳам ортиб бормоқда.

“Baumanfruit b.v.” компанияси Ўзбекистондан лимон, ўрик, шафтоли, нектарин, анор, узум, хурмо, мева шарбатларини импорт қилишга, шунингдек, Европа шериклари билан ҳамкорлик қилиш тажрибасига эга бўлган ўзбекистонлик фермер ва экспортчилар билан тўғридан-тўғри алоқаларни ўрнатишга тайёрлигини билдирди.

Шу билан бирга, юқори сифат, хавфсизлик, қадоқлаш, тақдим этиш, зарур сертификатлар мавжудлиги, катта ҳажмларда барқарор рақобатбардош нарх ва етказиб бериш имконияти каби импорт қилинадиган маҳсулотларга қўйиладиган асосий талаблар  ҳақида сўзлаб берилди.

Нидерландиялик тадбиркор маҳсулот етиштириш имконини берувчи ўз ер участкасига эга фермерлар ёки экспорт компаниялар билан тўғридан-тўғри ишлаш истагини билдирди.

Таъкидланганидек, бу сотиб олинган маҳсулотнинг юқори сифати ва бир хиллигини сақлашга, келгусида етказиб беришни режалаштиришга, юзага келиши мумкин бўлган муаммо ва келишмовчиликларни тезда ҳал қилишга ёрдам беради.

Учрашув сўнгида “Baumanfruit b.v.” компаниясини илгари суриш тўғрисида келишувга эришилди. Нидерландия бозорига янги узилган мевалар етказиб беришни йўлга қўйиш мақсадида Ўзбекистоннинг истиқболли экспортчилари билан шериклик алоқаларини ўрнатиш, шунингдек, эпидемиологик вазият яхшиланиши билан А.Бауманнинг Ўзбекистонга ташрифини ташкил этишга келишиб олинди.

Эслатиб ўтамиз, бундан олдин дипломатларимиз Ўзбекистон меваларини Европа бозорига етказиб беришга қизиқиш билдираётган Нидерландиянинг “Wilco Fruit b.v.” компанияси раҳбарияти билан ҳам келишувга эришганди.

Online Maslahat

Ism

E-mail

Maslahat

Useful links

booked.net
booked.net