ТОШКЕНТ, 15 май. /«Дунё» АА/. «Ўзбекнефтгаз» акциядорлик жамияти бошқаруви раиси Меҳриддин Абдуллаев «Hyundai Engineering Co., Ltd.» компанияси президенти Ким Чен-хак билан видеоконференция шаклида музокара ўтказди, деб хабар бермоқда «Дунё» АА мухбири жамият манбасига асосланиб.
Онлайн мулоқотда мамлакатимизда ўтган йиллар давомида «Hyundai Engineering Co., Ltd.» компанияси билан ҳамкорликда қатор стратегик лойиҳалар муваффақиятли амалга оширилгани алоҳида таъкидланди.
Учрашувда Қашқадарё вилоятида GTL заводини қуриш лойиҳасини амалга ошириш масалалари муҳокама қилинди.
Томонлар белгиланган муддатда завод қурилишини якунлаш учун биргаликдаги ҳаракатларни янада кучайтириш зарурлигини қайд этди.
М.Абдуллаев, ўз навбатида, COVID-19 коронавируси пандемияси билан боғлиқ вазиятга қарамай «Hyundai Engineering Co., Ltd.» компанияси GTL лойиҳаси бўйича чора-тадбирларнинг ўз вақтида амалга оширилаётганини алоҳида қайд этди.
Видеоконференция якунида қўшма лойиҳаларни амалга оширишни давом эттириш ва ҳамкорликнинг янги йўналишларини ривожлантиришга келишиб олинди.
